By Nay Thiha
တခေတ်တခါကသူငယ်ချင်းတွေမိသားစုဝင်တွေနဲ့ မိုနိုပိုလီတို့ မြွေလှေကားတို့ကစားရင်း ပျော်ရွှင်ခဲ့ရတာအားလုံးမှတ်မိကြမှာပါ။ တီဗီဂိမ်းနဲ့ကွန်ပျူတာပေါပေါများများမရှိသေးတဲ့ခေတ်မှာ အံစာတုံးလေးခေါက်ရင်းကစားရတဲ့board game တွေဟာ ကလေးဘ၀မှာအရေးပါတဲ့ကဏ္ဍကပါဝင်ခဲ့တာပေါ့။
၂၀၁၀ခုနှစ်နောက်ပိုင်းစမတ်ဖုန်းတွေ အင်တာနက်ဂိမ်းတွေတွင်ကျယ်လာပြီးနောက် ချစ်သူခင်သူတွေကြား board game ကစားတဲ့ဓလေ့တဖြည်းဖြည်းနည်းပါးလာပါတယ်။ အခုချိန်မှာမှိန်ပျောက်လုနီးပါးဖြစ်နေတဲ့ board game ယဉ်ကျေးမှုကိုတဖန်ပြန်လည်ဆန်းသစ်စေမယ့်တီထွင်ဖန်တီးမှုတခုကိုမြင်တွေ့ခဲ့ရပါတယ်။
Blue Belu Game Studios မှာ board game တွေကိုတခေတ်ဆန်းစေမယ့်စိတ်ကူးတွေရှိတယ်။ တချိန်တည်းမှာပဲမြန်မာ့ရိုးရာယဉ်ကျေးမှုကိုကမ္ဘာနဲ့မိတ်ဆက်ပေးဖို့ကြံစည်ထားတယ်။ရလဒ်ကတော့ “ပုဂံခရီးစဉ်” (Bagan Journey) ဆိုတဲ့ board game လေးပါ။
Blue Belu ဟာဒီနှစ်ထဲမှာမှစတင်တည်ထောင်ခဲ့တဲ့ကုမ္ပဏီဖြစ်ပြီး ပုဂံခရီးစဉ်ဟာသူတို့ရဲ့ပထမဆုံးထုတ်ကုန်ဖြစ်ပါတယ်။တည်ထောင်သူနဲ့ဂိမ်းဒီဇိုင်းရေးဆွဲသူ Jean Curci ဟာ မြန်မာ့ယဉ်ကျေးမှုကိုနိုင်ငံတကာပြပွဲတွေကနေတဆင့်ကမ္ဘာတလွှားကဂိမ်းပရိသတ်တွေနဲ့မိတ်ဆက်ပေးဖို့ Blue Belu ကိုတည်ထောင်ခဲ့တာလို့ဆိုပါတယ်။
“အခုလောလောဆယ်တော့အင်္ဂလိပ်ဘာသာနဲ့ပဲကစားလို့ရပါဦးမယ်။ ဒါကလည်းမြန်မာ့ယဉ်ကျေးမှုကိုဒီနိုင်ငံမှာလာရောက်နေထိုင်တဲ့ နိုင်ငံခြားသားတွေ ပြည်ပခရီးသွားတွေနဲ့မိတ်ဆက်ပေးလိုတဲ့အတွက် အင်္ဂလိပ်ဘာသာကိုအသုံးပြုပြီးစတင်ဖန်တီးထားရခြင်းဖြစ်ပါတယ်။ ဒါပေမယ့်ကစားနည်းစည်းကမ်းတွေကိုမြန်မာဘာသာအပါအ၀င် တခြားဘာသာစကားတွေဆီပြန်ဆိုနေပါပြီ။ ပြီးတာနဲ့ ကျနော်တို့ website မှာ download လုပ်လို့ရအောင်တင်ပေးမှာပါ” လို့ Curci ကဆိုပါတယ်။
ပုဂံခရီးစဉ်မှာကစားသမား ၂ယောက်ကနေ ၄ယောက်အထိပါဝင်ကစားနိုင်ပြီး တခါကစားလျှင် မိနစ် ၃၀လောက်ကြာမြင့်နိုင်ပါတယ်။ ရှေးဟောင်းပုဂံမြို့ကထင်ရှားတဲ့ဘုရားပုထိုး ၁၀ခုရဲ့အကြောင်းပါဝင်ပြီး ကစားသမားတွေဟာအံစာခေါက်ရင်း board တလျှောက်သွားပြီး အရပ်ဒေသတခုစီရဲ့အကြောင်းစူးစမ်းရမှာဖြစ်ပါတယ်။ ဘာသာရေးအဆောက်အအုံတွေအကြောင်း၊ ကျေးရွာတွေ ထင်ရှားတဲ့အရပ်ဒေသတွေအကြောင်းဖတ်ရှုရင်း discovery point တွေရမှာဖြစ်ပြီး discover point ၃၀အရင်ရတဲ့သူကအနိုင်ရရှိမှာပါ။ အပျင်းလည်းပြေသလို ပုဂံမြို့ရဲ့သမိုင်းကြောင်းကိုလည်းလေ့လာခွင့်ရမှာဖြစ်တယ်။
ဒီ board game ရဲ့တန်ဖိုးကတော့ ၂၁၉၀၀ ကျပ် ဖြစ်ပြီး အခုဒီဇင်ဘာလကစ၍ ရန်ကုန်၊ မန္တလေး၊ ပုဂံက Yangoods ဆိုင်ခွဲ ၇ဆိုင်မှာဝယ်ယူရရှိနိုင်ပါပြီ။ ဟိုတယ်တွေ၊ duty-free ဆိုင်တွေမှာလည်းတင်သွားမယ်လို့ Curci ကဆိုပါတယ်။
Curci အနေနဲ့ပုဂံနဲ့ပတ်သက်တဲ့ဂိမ်းတခုဖန်တီးဖို့ သြဂုတ် ၂၀၁၇ကတည်းကစိတ်ကူးရခဲ့တာဖြစ်ပြီး ဒီဂိမ်းရဲ့ဒီဇိုင်းနဲ့ ရုပ်ပုံဆွဲသားတဲ့အပိုင်းမှာ လူ ၃ယောက်ကတာဝန်ယူဖန်တီးခဲ့ပါတယ်။ ထုတ်လုပ်ရေး၊ ဖြန့်ချီရေးကနေ အရည်အသွေးထိန်းသိမ်းရေး၊ ဂိမ်းစမ်းသပ်ကစားရေးအပိုင်းတွေမှာတော့ လူဒါဇင်နဲ့ချီပါဝင်လုပ်ကိုင်ရတယ်လို့ဆိုပါတယ်။
ပွဲဦးထွက်ပုဂံခရီးစဉ်ပြီးတော့ ၁၄ရာစုမြန်မာနိုင်ငံနဲ့ပတ်သက်တဲ့ board game တခုဖန်တီးဖို့အချက်အလက်တွေစုဆောင်းနေပြီလို့သိရပါတယ်။ ဗီဒီယိုဂိမ်းလေးတွေထုတ်လုပ်ဖို့ game programmer တွေစုဆောင်းနေတယ်လို့လည်း Curci ကပြောပါတယ်။
အသေးစိတ်အချက်အလက်များကို https://www.bluebelu.com/baganjourney/ မှာဝင်ရောက်ဖတ်ရှုနိုင်ပါတယ်။
