ကမ္ဘာ့အကြီးဆုံးစာအုပ်ပွဲတော်ကနေ ဘာတွေမျှော်လင့်ထားလို့ရမလဲ

By Nay Thiha

ဒီနေ့မှာတော့ ကမ္ဘာ့အကြီးဆုံးစာအုပ်အရောင်းပွဲတော် Big Bad Wolf ရဲ့ VIP event ကို Myanmar Event Park မှာကျင်းပပြုလုပ်ခဲ့ပါတယ်။ ဒီပွဲကိုမီဒီယာသမားတွေနဲ့ Facebook VIP pass campaign မှာမဲပေါက်တဲ့သူတွေအတွက်မိတ်ဆက်တဲ့အနေနဲ့ကျင်းပပြုလုပ်တာပါ။ ပုံမှန်အရောင်းပွဲတော်ကတော့ ဇန်န၀ါရီလ ၁၈ရက်နေ့ကနေ ၂၈ရက်နေ့အထိ ၂၄နာရီပတ်လုံးပိတ်ရက်မရှိ ဖွင့်လှစ်ရောင်းချပေးသွားမှာဖြစ်ပါတယ်။ BBW ကိုသွားမယ်လို့စိတ်ကူးထားတဲ့စာဂျပိုးလေးတွေအတွက် ကျနော့်ရဲ့အတွေ့အကြုံတွေကိုပြောပြပေးချင်ပါတယ်။

• VIP ပွဲမှာတောင်လူတွေတော်တော်များပါတယ်။ ပိတ်ရက်တွေမှာဆိုရင်တော့ မတွေးဝံ့စရာပါပဲ။ ဒါကြောင့်ကြားရက်မနက်စောစောသွားခြင်းကအကောင်းဆုံးဖြစ်မှာပါ။
• စာအုပ်တွေကိုစာရေးဆရာနာမည်နဲ့မစီဘဲ အမျိုးအစားနဲ့စီထားတဲ့အတွက် ကိုယ့်စိတ်ကြိုက်စာရေးဆရာတွေ့ရဖို့တော်တော်ရှာယူရမှာပါ။ တချို့စာအုပ်တွေက title တခုကို ၄ ၅အုပ်လောက်သာရှိတာမို့သူများတွေထက်ဦးအောင်သွားထားမှတော်ကာကျမယ်နော်။
• စာအုပ် title တခုစီမှာ sample ဖတ်ဖို့တအုပ်ထားပေးထားတယ်။ ဒါကြောင့်အေးအေးဆေးဆေးစာမြည်းပြီးဝယ်လို့ရတယ်။ ရွေးတာအရမ်းကြာနေရင်တော့ ကိုယ့်စိတ်ကြိုက်စာအုပ်တွေကိုတခြားသူယူသွားနိုင်တယ်နော့်။
• ခန်းမရဲ့နောက်ပိုင်းတခြမ်းလုံးမှာကလေးသူငယ်တွေအတွက်ရည်ရွယ်ထုတ်ဝေတဲ့စာအုပ်တွေရှိပါတယ်။ ကတ်ထူနဲ့ပုံပြင်စာအုပ်လေးတွေကအစ ရောင်စုံခြယ်ခဲတံတွေအထိဝယ်ယူရရှိနိုင်တယ်။ သားသားမီးမီးလေးတွေရှိရင်ခေါ်သွားလိုက်ပါ။
• စာအုပ်တွေက ၅၀% ကနေ ၉၀% အထိ discount ဖြစ်ပါတယ်။ Little Fires Everywhere နဲ့ The Girl on the Train တို့လိုစာအုပ်တွေကိုကျပ် ၅၀၀၀-၇၀၀၀ ၀န်းကျင်လောက်နဲ့ဝယ်ယူနိုင်ပါတယ်။
• Paulo Coelho ရဲ့စာအုပ်တွေစုထားတဲ့ box set နဲ့ collection တွေရှိပါတယ်။ Set လိုက်ဝယ်ယူဖို့တော့လိုပါတယ်။
• Fiction, non-fiction title ပေါင်း ၂သောင်းကျော် စာအုပ်ပေါင်းတသန်းကျော်ရှိတဲ့အတွက် ရွေးစရာတွေကတော့အလွန်များတယ်။ သူငယ်ချင်းတွေနဲ့လာရင်တော့ပိုပျော်ဖို့ကောင်းမှာပေါ့။
• ရုပ်ရှင်ဝါသနာအိုးတွေအတွက် Zack Snyder ရဲ့ Watchmen ရုပ်ရှင်နောက်ကွယ်ကဖန်တီးမှုတွေအကြောင်း ပုံနဲ့တကွရှင်းပြထားတဲ့စာအုပ်တွေ၊ Fantastic Beasts artwork စာအုပ်တွေကိုလည်းဝယ်ယူရရှိနိုင်ပါတယ်။
• Edgar Allen Poe နဲ့ Jeffery Archer တို့ရဲ့ဝတ္ထုတိုပေါင်းချုပ်တွေ၊ Marvel comic တွေလည်းရှိပါတယ်။