စာရေးသူ Keith Lyons ဟာမြန်မာနိုင်ငံတောင်ပိုင်းကလူသူအရောက်အပေါက်နည်းတဲ့ လှိုဏ်ဂူတဂူအကြောင်း ပြောပြထားပါတယ်။ ဓာတ်ပုံတွေကိုတော့ David Van Driessche ကရိုက်ကူးထားပါတယ်။
မြန်မာနိုင်ငံတောင်ပိုင်းကိုစွန့်စားခန်းထွက်ပြီးနောက်ပိုင်းမှာတော့ လှိုဏ်ဂူတဂူကိုတွေ့ခဲ့ပါတယ်။ အဲ့ဒီအမည်မသိလှိုဏ်ဂူရဲ့နေရာအတိအကျကိုတော့ ရှင်းရှင်းလင်းလင်းမသိခဲ့ဘူး။ ပြီးတော့အဲ့ဒီနေရာကို ဘယ်လောက်ကြာကြာသွားရမယ်ဆိုတာကိုလည်းမပြောတတ်ပါဘူး။
ကျနော့်အနေနဲ့ကပ္ပလီပင်လယ် (Andaman Sea) နဲ့နီးတဲ့မုတ္တမကွေ့ကမြို့လေးတမြို့ဆီကနေ သင်္ဘောနဲ့ခရီးတိုလေးတခုသွားရင်း လှိုဏ်ဂူဆီရောက်ခဲ့တာလို့ထင်တာပဲဗျ။ ကျနော်နဲ့အတူ ခရီးထွက်ရတာဝါသနာကြီးတဲ့ Bjorn Burchard နဲ့ လူသူအရောက်အပေါက်နည်းတဲ့နေရာတွေကို ဓာတ်ပုံရိုက်ရတာဝါသနာထုံတဲ့ David Van Driessche တို့လည်းပါတယ်။
တောတွင်းခရီးထွက်ပြီးနောက်ကျနော့်ဘောင်းဘီမှာပြဲရာတွေအများကြီးပဲ။ တကိုယ်လုံးလည်းပွန်းရာပဲ့ရာတွေနဲ့ပြည့်လို့။ ဗိုက်ကလည်းဆာ၊ ရေကလည်းဆာ၊ တော်တော်လေးလည်းပင်ပန်းနေပြီ။
ဒါပေမယ့်ကျနော်စိတ်မညစ်ဘူးဗျ။ ဘာလို့လဲဆိုတော့လူသူအရောက်အပေါက်နည်းတဲ့ဒေသက လှိုဏ်ဂူတဂူကိုရှာတွေ့ခဲ့ပြီလေ။ ၁၈၂၇ခုနှစ်ကတည်းက ဘားအံနဲ့မော်လမြိုင်တ၀ိုက်ကမြေမျက်နှာသွင်ပြင်ကို မှတ်တမ်းတင်ခဲ့ပေမယ့် ဒီလှိုဏ်ဂူအကြောင်းဒေသခံတွေကတောင်မသိသေးဘူး။ သိရသလောက်တော့ ကျနော်တို့ကဒီလှိုဏ်ဂူထဲပထမဆုံးဝင်မယ့် နိုင်ငံခြားသားတွေပဲ။
အဲ့ဒီနေ့ကတော်တော်ပင်ပန်းတယ်ဗျ။ ကျနော်တို့အားလုံးမေလရဲ့အပူဒဏ်မှာချွေးဒီးဒီးကျနေကြပြီ။ ကျနော်တို့ရဲ့လမ်းပြကပင်စည်အမြစ်တခုကိုခြေရာခံရင်း ဂူပေါက်ဝကိုရှာတွေ့သွားတာလေ။ မသိရင်ကျနော်ကမစ္စစ္စပီမြစ်တလျှောက်မှာလူစွန့်စား ဟက်ကယ်ဘယ်ရီဖင်းနဲ့ခရီးသွားနေရသလိုပဲ။
ကျနော်တို့လည်းရေတိုက်စားထားလို့ချောမွေ့နေတဲ့ထုံးကျောက်အမိုးအောက်ကနေငုံ့ပြီးအထဲဝင်ကြည့်ကြတယ်။ “မိုးတွင်းဆိုရင်ဒီနေရာတခုလုံးရေအောက်ရောက်သွားတတ်တယ်ဗျ” လို့လမ်းပြကပြောတယ်။ အရင်အပတ်ကပဲမိုးကြီးလို့လှိုဏ်ဂူတချို့ရေထဲမြုပ်သွားသေးတယ်။
ရှေ့ကနေဦးဆောင်သွားနေတဲ့လူငယ်တယောက်ကဓားမနဲ့အဆူးတွေပါတဲ့နွယ်ပင်တွေကိုခုတ်ထွင်ရှင်းလင်းရတယ်။ အ၀င်လမ်းဟာချောကျိကျိနဲ့ဗျ၊ ပြီးတော့မှောင်မဲနေတာပဲ။ ကျနော်တို့မှာရှိသလောက်ဓာတ်မီးတပ်ခမောက်နဲ့ ဓာတ်မီးတွေရဲ့အကူအညီနဲ့ဂူထဲကိုကြည့်ကြည့်ပေမယ့် ဂူတခုလုံးကိုမမြင်ရဘူး။
ဒါပေမယ့်ဂူအမိုးမှာတွဲလောင်းခိုနေတဲ့လင်းနို့တွေကတော့ အနှောင့်အယှက်ဖြစ်သွားပုံပဲဗျ။ သူတို့ရဲ့မျက်လုံးတွေကမီးဝင်းဝင်းတောက်နေတယ်။ ကျနော့်ခေါင်းပေါ်ကနေလင်းနို့တကောင်ဖြတ်ပျံသွားတာကို သတိထားမိတယ်။ လန့်ပြီး အားကနဲအော်လိုက်တော့ လှိုဏ်ဂူထဲကနေပဲ့တင်သံပြန်ထွက်လာတယ်။
လှိုဏ်ဂူနံရံမှာနွယ်ပင်တွေနဲ့ထုံးကျောက်တိုင်တွေရောယှက်တည်ရှိနေတယ်။ ဂူအတွင်းလှည့်ပတ်လေ့လာကြည့်တော့ ကျောက်ခတ်ပန်းဆွဲတွေ ထုံးကျောက်တိုင်တွေအများကြီးတွေ့ခဲ့တယ်။ တချို့ထုံးကျောက်တွေဟာလေနဲ့ရေရဲ့ပြုပြင်မှုကြောင့် ပတ္တလားလိုပုံစံလေးဖြစ်နေတာတောင်တွေ့ရတယ်။ ဒါပေမယ့်ကြည့်ရုံပဲကြည့်ပြီး မထိမိမကိုင်မိအောင်တော့သတိထားရတယ်ဗျ။
ဂူအတွင်းမှာအကွေ့အကောက်တွေကလည်းများပါ့ဗျာ။ တနေရာမှာဆိုထုံးကျောက်တွေက ကျားတကောင်ခုန်အုပ်တော့မယ့်ဒီဇိုင်းဖြစ်နေတာလည်းတွေ့ရရဲ့။ ကျနော့်မိတ်ဆွေတွေကိုအဲ့ဒီပုံကိုပြဖို့လှည့်ကြည့်တော့ သူတို့ကတခြားလှိုဏ်ခန်းတခုဆီတောင်ရောက်နေကြပြီ။
ဝင်္ကပါလိုဖြစ်နေတဲ့လှိုဏ်ဂူအတွင်းခန်းကို ဘယ်လောက်ကျယ်လဲပြောဖို့ခက်ပါတယ်။ ဂူအမိုးပြိုထားတဲ့နေရာကိုရောက်တဲ့အချိန်မှာဂလိုင်တခုထဲကနေတွယ်တက်ပြီးနောက်ထပ်ဥမင်လှိုဏ်ခေါင်းတွေဆီရောက်သွားတယ်။ အဲ့ဒီဥမင်တွေရဲ့နံရံမှာမြစ်ကပို့ချတဲ့အနည်နဲ့နုံးတွေစုနေပြီး လင်းနို့ချေးနံ့ကလည်းတထောင်းထောင်းထနေတယ်။
တိုက်စားခံထားရတဲ့ထုံးကျောက်တွေကိုကြည့်ရင်း အချိန်နဲ့ရေဟာဘယ်အရာကိုမဆိုတိုက်စားနိုင်စွမ်းရှိကြောင်း သတိထားမိခဲ့တယ်။ လှိုဏ်ဂူတွင်းလမ်းဆုံတနေရာကိုရောက်တော့ နတ်ရုပ်တုတခုနဲ့ပိုက်ကွန်ဟောင်းတခုကိုအံ့သြဖွယ်တွေ့လိုက်ရတယ်။ လမ်းပြကတော့ဒါဟာလင်းနို့ဖမ်းတဲ့သူတွေကျန်ခဲ့တာဖြစ်မယ်လို့သုံးသပ်တယ်။
အနားမှာမြွေအကြီးကြီးတကောင်ခွေနေတာလည်းတွေ့ရရဲ့။ မြွေကြီးကကြီးလွန်းလို့စတွေ့တွေ့ချင်းတုန်းက နှစ်ကောင်များလားလို့တောင်တွေးမိတယ်။ ကျနော်တို့နဲ့အတူပါလာတဲ့ဒေသခံတွေကတော့ အန္တရာယ်မရှိပါဘူးလို့ဆိုပါတယ်။
နောက်ထပ်လှိုဏ်ခန်းတခုထဲမှာတော့ခေါင်မိုးပေါ်ကနေတွဲလောင်းကျနေတဲ့ကျောက်တိုင်တခုကိုတွေ့ရတယ်။ ပြီးတော့ခရုပတ်ဗွေအခွံတွေကိုပါအစုလိုက်အပုံလိုက်တွေ့ရပါတယ်။ ဒါတွေဟာလည်းအချိန်တခုကြာလာရင် ထုံးကျောက်တွေအဖြစ်ပြောင်းလဲသွားမယ်လို့ထင်ရပါတယ်။
Moby Dick Tours (myanmartravel.cc) နဲ့ချိတ်ဆက်ပြီးအဲ့ဒီဂူကိုသွားလည်လို့ရပါတယ်။ ဒါပေမယ့်ပွင့်လင်းရာသီမှာပဲသွားလည်လို့ရမှာဖြစ်ပြီး လမ်းပြမခေါ်မဖြစ်ခေါ်သွားသင့်ပါတယ်။ ကျန်းမာသန်စွမ်းနေဖို့လိုအပ်သလို ဖြတ်ဖြတ်လတ်လတ်နဲ့စွန့်စားချင်စိတ်ရှိဖို့လည်းလိုအပ်ပါတယ်။
Keith Lyons ဟာနယူးဇီလန်လူမျိုးခရီးသွားစာရေးဆရာတယောက်ဖြစ်ပြီး မြန်မာနိုင်ငံတ၀ိုက်လေ့လာလည်ပတ်နေတာ ၁၀စုနှစ်တခုလောက်ရှိနေပါပြီ။ Opening Up Hidden Burma ဆိုတဲ့စာအုပ်ကိုပူးတွဲရေးသားတည်းဖြတ်ခဲ့သလို မြိတ်ကျွန်းစုအကြောင်းရေးသားထားတဲ့ The Last Untouched Paradise ဆိုတဲ့စာအုပ်ကိုလည်းဓာတ်ပုံဆရာ David Van Driessche နဲ့ရေးသားပြုစုနေပါတယ်။
၎င်းတို့နှစ်ဦးရဲ့သတင်းများကို Keith Lyons (keithlyons.net) David Van Driessche (davidvandriessche.com) တို့မှာဖတ်ရှုနိုင်ပါတယ်။
(ဘာသာပြန်ဆိုသူ – နေသီဟ)
