By Nay Thiha
ဂျပန် anime တွေကိုဟောလိဝုဒ်ကပြန်ရိုက်တဲ့ရုပ်ရှင်တော်တော်များများငွေရေးကြေးရေးအရဖြစ်ဖြစ် ဝေဖန်ရေးရှုထောင့်ကပဲဖြစ်ဖြစ် မအောင်မြင်တာများပါတယ်။ Alita: Battle Angel ကတော့ James Cameron ရဲ့ဦးဆောင်မှုနဲ့ ဒါရိုက်တာ Robert Rodriguez ရဲ့ဖန်တီးမှုတို့ကြောင့် ပရိသတ်တော်တော်များများကမျှော်လင့်နေကြပါတယ်။ ဒီဆောင်းပါးမှာတော့ spoiler မပါတဲ့ ဇာတ်လမ်းအညွှန်းလေးပြောပြပြီး Zalem, Panzer Kunst နဲ့ Motorball စတဲ့ရုပ်ရှင်ရဲ့အရေးပါတဲ့ ဇာတ်ကွက်တွေ နေရာတွေအကြောင်းရှင်းပြချင်ပါတယ်။
သက္ကရာဇ် ၂၅၆၃ ခုနှစ်မှာ The Fall လို့ခေါ်တဲ့စစ်ပွဲကြီးကြောင့် ကမ္ဘာတခုလုံးပျက်စီးထိခိုက်ခဲ့ရတယ်။ ယန္တရားပညာရှင် Dyson Ido ဟာ သံထည်အပျက်အစီးတွေထားတဲ့အမှိုက်ပုံမှာ လူတပိုင်းယန္တရားတပိုင်းအမျိုးသမီးတယောက်ရဲ့ဦးခေါင်းပိုင်းကိုရှာတွေ့တယ်။ အဲ့ဒီထဲမှာဦးနှောက်ကအကောင်းပကတိကျန်သေးတာကိုတွေ့ရပါတယ်။ သူလည်းစက်ရုပ်ကိုပြန်ပြင်ပြီးခန္ဓာကိုယ်အသစ်တခုပေးရင်း ကွယ်လွန်သွားပြီဖြစ်တဲ့သူ့သမီးရဲ့နာမည်ကိုလိုက်ပြီး Alita လို့အမည်ပေးလိုက်တယ်။ (မန်ဂါထဲမှာတော့ Ido ကသေသွားတဲ့သူ့ကြောင်လေးနာမည်ကိုလိုက်ပြီး Alita လို့ပေးလိုက်တာပါ) Alita ဟာသူ့အတိတ်ကို လုံးဝမမှတ်မိပါဘူး။
Alita ဟာ Hugo ဆိုတဲ့ကောင်လေးနဲ့ရင်းနှီးသွားပြီး Hugo ကသူမကို Motorball အားကစားအကြောင်း မိတ်ဆက်ပေးတယ်။ ဒီအားကစားနည်းမှာမနုဿစက်ရုပ်တွေအချင်းချင်းသေတဲ့အထိတိုက်ခိုက်ရပါတယ်။
တနေ့မှာ Ido ကို Grewishka ဦးဆောင်တဲ့မနုဿစက်ရုပ်တွေကသတ်ဖို့ကြိုးစားနေတာကိုတွေ့သွားပြီး Alita က၀င်ကယ်ရင်း သူမအတိတ်ကတတ်မြောက်ခဲ့တဲ့ကိုယ်ခံပညာ Panzer Kunst ကိုသုံးပြီးတိုက်ခိုက်လိုက်တယ်။ Ido ဟာတချိန်က Hunter-Warrior တယောက်ဖြစ်ခဲ့ကြောင်းသိပြီးတဲ့နောက် Alita ဟာလည်း Hunter-Warrior တယောက်ဖြစ်ချင်လာတယ်။ ဒါပေမယ့် Alita ကိုစိတ်ပူလို့ Ido ကခွင့်မပြုခဲ့ဘူး။ နောက်နေ့မှာ သံထည်အမှိုက်ပုံထဲက Berserker ကိုယ်ထည်တခုကို Alita ကကောက်လာပြီး သူမနဲ့ချိတ်ဆက်ပေးဖို့ပြောပေမယ့် Ido ကကိုယ်ထည်နဲ့ Alita နှလုံးသားအတွဲအစပ်မညီမှာစိုးတဲ့အတွက် ငြင်းဆန်လိုက်တယ်။
Alita လည်း Ido ကိုစိတ်ဆိုးပြီး Hunter-Warrior လျှောက်ဖို့စာရင်းပေးလိုက်တယ်။ Kansas Bar မှာ Grewishka ကိုအနိုင်ယူဖို့တခြား Hunter-Warrior တွေကိုအကြံဥာဏ်တောင်းပေမယ့် Grewishka ကအလိုရှိတဲ့စက်ရုပ်အပြစ်သားမဟုတ်တာကြောင့် Alita ကိုဘယ်သူကမှမကူညီကြဘူး။ အဲ့ဒီမှာကိုယ်ထည်အသစ်နဲ့ Grewishka ရောက်လာပြီး Alita ကိုစိန်ခေါ်တိုက်ခိုက်ကြရင်း Alita ကိုယ်ထည်ပျက်စီးသွားသလို Grewishka လည်းမျက်စိကန်းသွားတယ်။ အဲ့ဒီနောက် Ido တို့ရောက်လာပြီး Alita ကိုကယ်ထုတ်သွားပါတယ်။ ဒီလိုနဲ့ပဲ Ido လည်း Alita ကို Berserker ကိုယ်ထည်မှာတပ်ဆင်ပေးလိုက်ရတယ်။
Hugo ကိုချစ်မိသွားတဲ့ Alita ဟာ သူ့ကို Zalem ဆီပို့နိုင်ဖို့ Motorball မှာပါဝင်ယှဉ်ပြိုင်ဖို့ဆုံးဖြတ်လိုက်တဲ့အခါ…။ နောက်ပိုင်းဘာဖြစ်မလဲဆိုတာကိုတော့ ငွေရောင်ပိတ်ကားပေါ်မှာပဲစောင့်မျှော်ကြည့်ရှုကြပါနော်။ အခု Zalem, Panzer Kunst နဲ့ Motorball တို့အကြောင်းပြောပြသွားပါ့မယ်။ ဒါတွေက manga နဲ့ anime ထဲမှာအလွန်အရေးပါတဲ့ကဏ္ဍကပါဝင်ပါတယ်။
Zalem
Manga ထဲမှာ Tiphares လို့ခေါ်တဲ့ဒီအရပ်ဟာကောင်းကင်ထဲမှာတည်ရှိတဲ့မြို့ကြီးဖြစ်ပြီး ရုပ်ရှင်ထဲမှာ Iron City လို့ခေါ်တဲ့ Scrapyard ဟာ Zalem လိုအပ်တဲ့သံထည်တွေကိုပံ့ပိုးပေးရပါတယ်။ Iron City ထဲမှာနေကြတဲ့မြို့သူမြို့သားတွေဟာ ချမ်းသာကြွယ်ဝသူတွေနေထိုင်တဲ့ Zalem ဆီသွားလိုကြတယ်။
Panzer Kunst
ဂျာမန်ဘာသာစကားနဲ့ဆို armored art (သံချပ်ကာဝတ်အနုပညာ) လို့ခေါ်တဲ့ကိုယ်ခံပညာဟာ မြေဆွဲအားမရှိတဲ့အာကာသထဲမှာတိုက်ခိုက်တဲ့နေရာမှာသုံးပါတယ်။ လှုပ်ရှားမှုနဲ့တိုက်ကွက်တွေအားလုံးကို ဂျာမန်ဘာသာနဲ့ရေးထားပြီး ဒီပညာတတ်မြောက်သူတွေကို Künstler (artist – အနုပညာရှင်) လို့ခေါ်ပါတယ်။ အာရုံအမျိုးမျိုးကြားမှာမိမိကိုယ်ခန္ဓာနဲ့တသားတည်းဖြစ်နေဖို့လိုအပ်ပြီး သံချပ်ကာဝတ်ဆင်ထားတဲ့ မနုဿစက်ရုပ်တွေရဲ့အတွင်းကလီစာကိုထိခိုက်စေဖို့ တုန်ခါအားမြင့်တဲ့တိုက်ကွက်တွေသုံးရပါတယ်။ အထူးသဖြင့်ကိုယ့်ထက်အရွယ်အစားကြီးတဲ့ရန်သူကိုတိုက်ခိုက်တဲ့နေရာမှာအလွန်အသုံးဝင်တယ်။
Motorball
ဒါကတော့ Scrapyard မှာနေထိုင်သူတွေအနေနဲ့၎င်းတို့ရဲ့ခက်ခဲပင်ပန်းတဲ့ဘ၀ကို ခေတ္တမေ့ပျောက်ပြီးအပန်းပြေနိုင်ဖို့ ရောမခေတ် Gladiator ကစားပွဲဆန်ဆန်ကျင်းပတဲ့ပွဲဖြစ်ပါတယ်။ လေးလံလှတဲ့ Motorball ကြီးကို finish line အပြင်ရောက်အောင်ယူသွားနိုင်တဲ့သူ သို့မဟုတ် နောက်ဆုံးအသက်ရှင်ကျန်ခဲ့တဲ့သူကအနိုင်ရမှာပါ။ အနိုင်ရတဲ့ Motorball Champion တွေဟာ Zalem မှာနေထိုင်ခွင့်ရရှိပါတယ်။
