Nay Thiha
ခုရက်ပိုင်းညနေစောင်းလာတာနဲ့ အအေးပိုလာတာကိုခံစားမိမှာပါ။ ရုံးဆင်းတဲ့အခါအိမ်မပြန်သေးဘဲ ရာသီဥတုအေးအေးလေးမှာအပူအစပ်စားချင်တယ်၊ ထိုင်းစာနဲ့မာလာရှမ်းကောတွေကိုလည်းရိုးနေပြီဆိုရင်တော့ ပူပူစပ်စပ်ကိုရီးယားစတိုင်ခေါက်ဆွဲတွေအဓိကရနိုင်တဲ့ Junction City ၅လွှာက YKKO ရဲ့ဘေးမှာဖွင့်ထားတဲ့ ChilliBoom ကိုညွှန်းပေးချင်ပါတယ်။
ဖွင့်တာတလလောက်ပဲရှိသေးတဲ့ဒီဆိုင်လေးမှာထူးခြားတာက အစပ် level ၇ဆင့်အထိရှိတာပါပဲ။ ပုံမှန်အားဖြင့် ၁ နဲ့ ၃အတွင်းကအတော်များများစားနိုင်ကြပြီး ၄နဲ့အထက်ကတော့ challenge level လို့ခေါ်ကြပါတယ်။ ကိုယ်စားနိုင်မယ်ထင်သလောက် အစပ်ကိုတဆင့်ချင်းတင်ပြီးစားကြည့်လို့ရသလိုမစားနိုင်တော့တဲ့အခါပြန်လျှော့ခိုင်းလို့လည်းရပါတယ်။ ဒါကြောင့်အရမ်းစပ်ရင်ငါစားနိုင်ပါ့မလားဆိုပြီး စိုးရိမ်စရာမလိုပါဘူး။
ဒီဆိုင်ရဲ့ထူးခြားချက်ကခေါက်ဆွဲဟင်းလျာတွေအားလုံးမှာ ramen ခေါက်ဆွဲကိုသုံးထားတဲ့အတွက် ခေါက်ဆွဲသားဟာနူးညံ့ပြီးအရသာပြည့်ဝတာပါပဲ။ တယောက်တည်းသွားမယ်ဆိုရင်တော့ Beef Noodle Soup ကိုအရင်စမ်းကြည့်ပါ။ ကင်ချီအနှစ်နဲ့လုပ်ထားတဲ့ဟင်းရည်ဟာအဆီနည်းပြီး ချိုချိုစပ်စပ်အရသာရှိပါတယ်။ ကျနော်ကတော့ Beef Soup ကို Level 2 နဲ့စားခဲ့ပါတယ်။ ခေါက်ဆွဲကြော်ကြိုက်တယ်ဆိုရင်တော့ Lunch Set ကိုရွေးပါ။ ပုစွန်၊ ကင်းမွန်၊ ငါးအသားလုံး၊ ဂဏန်းချောင်းတွေပါတဲ့ ခေါက်ဆွဲကြော်ဟာ ကင်ချီအနှစ်နဲ့ခေါက်ဆွဲကိုလုံးပြီး ဒယ်အိုးထဲကြော်ထားတာမို့ ဆီမများဘဲချိုစပ်စပ်အရသာရှိတယ်။ သူနဲ့တွဲစားဖို့ လတ်ဆတ်တဲ့ပင်လယ်ရေညှိနဲ့ တို့ဟူးတွေထည့်ထားတဲ့ဟင်းသီးဟင်းရွက်ဟင်းရည်တခွက်နဲ့ ကိုကာကိုလာတခွက်ပါပါတယ်။ ဒါကြောင့်ခေါက်ဆွဲကြော်ကို အစပ် Level 3 လောက်အထိတင်ပြီး စားကြည့်သင့်ပါတယ်။ စပ်ရင်ဟင်းရည်ချိုချိုလေးသောက်ရုံပါပဲ။
Beef Soup Lunch Set
သူငယ်ချင်း ၃ယောက်လောက်စုပြီးသွားမယ် ဒါမှမဟုတ် ကိုယ့်ချစ်သူနဲ့သွားမယ်ဆိုရင်တော့ ChilliBoom Spicy Noodle (The Lot) ကိုစားကြည့်ပါ။ ကင်ချီအနှစ်နဲ့ချက်ထားတဲ့ခေါက်ဆွဲပြုတ်ထဲမှာ ကြက်၊ ၀က်၊ အမဲသား၊ ပုစွန်ထုပ်၊ ကင်းမွန်၊ ဂဏန်းချောင်း၊ ငါးအသားလုံး၊ ကြက်ဥချောင်းတွေပါပြီး မှို ၅မျိုးနဲ့ ဟင်းသီးဟင်းရွက်မျိုးစုံပါဝင်ပါတယ်။ သူ့ကိုတော့ Level 3 ကစပြီးစားကြည့်တယ်။ နည်းနည်းခံနိုင်လာတဲ့အခါ Level 4 အထိတင်ပြီး စားကြည့်ခဲ့ပါတယ်။ စဖွင့်ကတည်းကနေအခုချိန်ထိ စားသုံးသူတွေက Level 4 ကိုအမြင့်ဆုံးထားပြီးစားကြည့်ကြတယ်လို့ store manager မအေးနန္ဒာကျော်ကဆိုပါတယ်။
ဟင်းပွဲတွေထဲမှာပါတဲ့အသားနဲ့အရွက်တွေအပြင်ထပ်စားချင်သေးတယ်ဆိုရင်တော့ add-on အဖြစ်အသားနဲ့အရွက်မျိုးစုံကို ဈေးနှုန်းသက်သက်သာသာနဲ့မှာယူနိုင်ပါသေးတယ်။ Menu အသစ်အဖြစ် သစ်သီးဖျော်ရည်၊ ဗီယက်နမ်ကော်ဖီ၊ bubble tea၊ ကိုရီးယားကင်ချီထမင်းကြော်တို့ ထပ်တိုးဖို့ရှိတယ်လို့လည်းသိရပါတယ်။ ဘာပဲပြောပြော ChilliBoom ဟာအပူအစပ်ကြိုက်သူတွေနှစ်သက်မယ့်ဆိုင်မျိုးပါ။ ကိုယ့်သူငယ်ချင်းတွေကြား ဘယ်သူအစပ်ဘယ်လောက်စားနိုင်လဲလို့စိန်ခေါ်ပြီးစားချင်တယ်ဆိုရင်လည်းရတယ်နော်။ အရမ်းစပ်လို့မစားနိုင်တော့ဘူးဆိုရင် ဖော်ရွေပျူငှာတဲ့ဝန်ထမ်းတွေက သင့်စိတ်ကြိုက်အနေအထားရောက်အောင်ပြုပြင်ပေးပါလိမ့်မယ်။
ChilliBoom Spicy Noodle (The Lot)
