By Nay Thiha
၂၀၁၇ခုနှစ်လောက်ကစပြီး မြန်မာ့ရုပ်ရှင်လောကမှာထူးခြားတဲ့လှုပ်ရှားမှုတွေတွေ့လာရတယ်။ “လှိုင်းသစ်” လို့အများကခေါ်ကြတဲ့ဒီလှုပ်ရှားမှုမှာ အတွေးအမြင်သစ်၊ တင်ပြပုံအသစ်တွေနဲ့ရုပ်ရှင်တွေကို မြန်မာပြည်သူတွေကြည့်ရှုခံစားခွင့်ရလာကြတယ်။ ထူးပိုင်ဇော်ဦး၊ ခရစ္စတီးနားခီတို့လိုဒါရိုက်တာတွေက ဒီလှုပ်ရှားမှုရဲ့ရှေ့တန်းမှာပါဝင်ပါတယ်။ ဒီဆောင်းပါးမှာတော့အက်ရှင်ပြကွက်ဆန်းဆန်းပြားပြားတွေရိုက်ကူး ပုံဖော်ရတာကိုနှစ်သက်တဲ့ဒါရိုက်တာဥာဏ်ထင်ရဲ့ အဇ္ဈတ္တတံခါးကိုလှစ်ကြည့်ခဲ့ပါတယ်။
“၂၀၁၃ခုနှစ်လောက်တုန်းကဒါရိုက်တာကိုဇော်ကိုကိုတို့ဆီမှာ creative director အနေနဲ့စလုပ်တယ်။ ကြော်ငြာ၊ music video တွေထုတ်လုပ်ပြီး ဇာတ်ညွှန်းတွေလည်းရေးဖြစ်တယ်။ အဲ့ဒီကနေဒါရိုက်တာစလုပ်ဖြစ်တယ်ဆိုပါတော့” လို့ဒါရိုက်တာဥာဏ်ထင်ကသူဒီလောကထဲရောက်လာပုံနဲ့ ပတ်သက်ပြီးရှင်းပြပါတယ်။
ဥာဏ်ထင်ဟာဇာတ်ညွှန်းတွေပဲရေးဖြစ်နေရာကနေသူငယ်ချင်းတယောက်ရဲ့တောင်းဆိုမှုနဲ့သီချင်းတပုဒ်ကို music video အဖြစ်ရိုက်ကူးခဲ့ရာကနေဒါရိုက်တာအလုပ်ကိုစိတ်ဝင်စား လာတာပါ။
၂၀၁၈နှစ်ဆန်းလောက်ကထွက်ရှိခဲ့တဲ့ သူ့ရဲ့ပထမဆုံးရုပ်ရှင် Dimensions (မျက်နှာပြင်များ) ဟာအတိတ်မေ့နေတဲ့ကြေးစားစစ်သားတယောက်နဲ့အကြမ်းဖက်သမားလောကအကြောင်းဇာတ်အိမ်တည်ထားတာဖြစ်ပါတယ်။ ဇာတ်လမ်းကဆန်းသစ်သလိုထိုးကြိတ်သတ်ပုတ်တဲ့ အခန်းတွေကိုသရုပ်ဆောင်တွေ ကိုယ်တိုင်ကိုယ်ခံပညာလေ့ကျင့်ရင်း ရိုက်ကူးတာဖြစ်တဲ့အတွက်သွက်လက်ပြီးသဘာဝကျတယ်။ အမြင်အာရုံနဲ့အသံပိုင်းဆိုင်ရာအထူးပြုလုပ်ချက်တွေကိုလည်းထည့်သွင်းထားတဲ့အတွက်မြင်နေကျ မြန်မာအက်ရှင်ဇာတ်ကားတွေနဲ့မတူညီတဲ့ခံစားချက်မျိုးပေးစွမ်းနိုင်ခဲ့တယ်။
ဒါပေမယ့်ဈေးကွက်ထိုးဖောက်မှုပိုင်းအားနည်းခဲ့ပုံနဲ့ပတ်သက်ပြီး ဥာဏ်ထင်ကအခုလိုသုံးသပ်ပါတယ်။ “အဲ့ဒီတုန်းကဥပါယ်တံမျဉ်ကအရမ်းပေါက်နေတဲ့အချိန်မှာ သူနဲ့ကပ်ရပ်တင်မလားဆိုပြီး ရုပ်ရှင်ရုံတွေဘက်က ကမ်းလှမ်းလာတယ်။ သူ့ရဲ့အောင်မြင်မှုအရှိန်မကုန်သေးတဲ့အခါမှာတင်လိုက်မိတော့ ပရိသတ်အာရုံကိုသိပ်မရလိုက်ဘူး။ နောက်တချက်ကရုံတင်ရက်ကမ်းလှမ်းတဲ့ရက်နဲ့ တင်တဲ့ရက်ကြားမှာ ၂ပတ်လောက်ပဲအချိန်ရတော့ marketing လည်းသေချာလုပ်ခွင့်မရလိုက်ဘူး။”
လူထုထဲအောင်မြင်သင့်သလောက်မအောင်မြင်ခဲ့ပေမယ့် ကြည့်ရှုသူပရိသတ်တွေ၊ Datshin လို Facebook ပေါ်မှာလူသိများတဲ့ review page တွေရဲ့အပြုသဘောဆောင်တဲ့ မှတ်ချက်တွေကြောင့် ကျေနပ်ခဲ့ရတယ်လို့ ဥာဏ်ထင်ကဆိုတယ်။
“ကြည့်ဖူးတဲ့သူတိုင်းကြိုက်တယ်။ ဒါပေမယ့်တော်တော်များများမကြည့်ဖူးလိုက်ကြဘူး” လို့ပြုံးလျက်ပြောပါတယ်။
Steven Spielberg, David Fincher, JJ Abrams တို့ကိုသဘောကျနှစ်သက်တဲ့ ဥာဏ်ထင်ဟာ အက်ရှင်ကားတွေနဲ့ပတ်သက်ပြီးသူ့ရဲ့အမြင်ကိုခုလိုပြောပြပါတယ်။ “ကိုယ်ကအက်ရှင်ကားတွေအရမ်းကြိုက် တယ်။ ဒါပေမယ့် Fast and Furious တို့လိုကားတွေဟာအက်ရှင်ပဲအသားပေးပြီး ဇာတ်လမ်းပိုင်းကျသိပ် မရှိဘူး။ Sicario တို့ Jason Bourne တို့လိုရုပ်ရှင်တွေကျဇာတ်လမ်းအဓိကထားပြီး အက်ရှင်ကဇာတ်ကို ပံ့ပိုးတဲ့အနေနဲ့ပဲရှိတယ်။ Dimensions နဲ့ မြို့ပြမုဆိုးများကိုရေးတော့ဇာတ်လမ်းပိုင်းနဲ့ ဇာတ်ကောင်တွေကိုအဓိကတည်တယ်။ ဇာတ်လမ်းခိုင်ပြီဆိုတော့မှ ဇာတ်ကိုပံ့ပိုးနိုင်တဲ့အက်ရှင်ခန်းတွေကိုတည်ပါတယ်။”
“မြို့ပြမုဆိုးများ” လို့အမည်ပေးထားတဲ့အက်ရှင်ဇာတ်ကားကို မတ်လထဲမှာရုံတင်ပြသသွားမှာ ဖြစ်တဲ့အတွက်ပရိသတ်တွေကိုအားပေးဖို့ဖိတ်ခေါ်ထားပါတယ်။
“လူငယ်တွေကြိုးစားဖန်တီးထားတဲ့ရုပ်ရှင်လည်းဖြစ်၊ မင်းသားမင်းသမီးတွေကော ရိုက်ကူးရေးအဖွဲ့သားတွေကောအပင်ပန်းခံဖန်တီးထားတဲ့ရုပ်ရှင်လည်းဖြစ်တဲ့အတွက် ပေါ့ပေါ့ပျက်ပျက်လုပ်ထားတာမဟုတ်ဘူးဆိုတာတော့အာမခံနိုင်ပါတယ်။ မြို့ပြမုဆိုးများ (City Hunter) ဆိုတဲ့နာမည်ကြောင့်တချို့တွေကကော်ပီလို့ထင်နေကြတယ်။ အမှန်တော့ကိုယ်ပိုင်ဖန်တီးမှုဇာတ်လမ်းပါ။ အဆင်ပြေလို့ရှိရင်ကြည့်ဖြစ်အောင်ကြည့်ပေးကြပါ၊ ဖန်တီးမှုအသစ်တခုကိုမြင်ရမှာပါ။”
အက်ရှင်ကားနှစ်ကားရိုက်ကူးပြီးနောက်ပိုင်းမှာဖန်တီးမှုအသစ်အနေနဲ့ပေါ့ပေါ့ပါးပါးဒရာမာကားလေးတကားကိုလည်းရိုက်ကူးသွားဖို့ရှိပါတယ်လို့ဆိုပါတယ်။
မြို့ပြမုဆိုးများရုပ်ရှင်ဇာတ်ကားရဲ့ trailer ကိုအောက်တွင်ဖော်ပြထားပါတယ်။
