By Nay Thiha
ဟော့ပေါ့တပွဲကောင်းမကောင်းအဆုံးအဖြတ်ပေးတာဟင်းရည်လို့ပြောရင် ဟော့ပေါ့ကြိုက်သူတွေအားလုံး လက်ခံကြမယ်ထင်ပါတယ်။ Fisherman’s Wharf ကဟော့ပေါ့ကတော့လတ်ဆတ်တဲ့ငါးကိုအခြေခံချက်ပြုတ် တာဖြစ်ဖြစ်ပြီး အချိုမှုန့်မသုံးဘဲငါးရဲ့အချိုကိုပဲအခြေခံထားတဲ့အတွက် စားပြီးရင်ရေငတ်တာ သွေးလေးတာတွေဖြစ်စေမှာမဟုတ်ပါဘူး။ သင်္ကြန်မှာလျှောက်လည်ရင်း ခရီးသွားရင်းကုန်သွားတဲ့အားတွေကို Fisherman’s Wharf ရဲ့ဟော့ပေါ့စားပြီးပြန်ဖြည့်လိုက်ရင်တော့ နှစ်သစ်တခုကိုအားအင်အပြည့်နဲ့ဖြတ်သန်းဖို့ အဆင်သင့်ဖြစ်နေမှာပါ။
တရုတ်ပြည်ကဆိုင်ကို franchise ယူပြီးဖွင့်ထားတဲ့ Fisherman’s Wharf မှာဟင်းရည်အရသာ ၅ မျိုးနဲ့ ငါး ၆ မျိုးကနေစိတ်ကြိုက်ရွေးချယ်လို့ရပါတယ်။ ကျနော်တို့ကတော့ Fisherman’s Specialty ဟင်းရည်ကို ငါးရံ့နဲ့ ရွေးလိုက်တယ်။ ဟင်းရည်ထဲထည့်စားဖို့အစာတွေကတော့ အမျိုးအမည်များလွန်းတဲ့အတွက် တော်တော်ရွေးယူရတယ်ဗျ။ ဒါပေမယ့်ဖော်ရွေပျူငှာတဲ့ဝန်ထမ်းလေးဟာ ဟင်းရည်နဲ့လိုက်ဖက်တဲ့ အစာတွေအကြောင်းစိတ်ရှည်လက်ရှည်ရှင်းပြပါတယ်။ ချဉ်စပ်အရသာရှိပြီး အထုံအရသာလေးပါတဲ့ ဒီဟင်းရည်အတွက် စည်သွပ်ဝက်သားပြား၊ ငါးဥသွပ်ငါးအသားလုံး၊ ပုစွန်အသားလိပ်နဲ့ ရေချိုပုစွန်ထုပ်တွေကတော့လိုက်ဖက်တဲ့ရွေးချယ်မှုဖြစ်မှာပါ။ ပြီးတော့အရွက်စုံနဲ့ မှိုစုံတပွဲစီရယ်၊ အရံအနေနဲ့ကြက်ဥပန်ကိတ်ကြော်နဲ့ကြွက်နားရွက်မှိုသုပ်ရယ်မှာလိုက်ပါတယ်။
မှာထားတာတွေရောက်မလာခင် ဆိုင်ကိုတပတ်လောက်လျှောက်ကြည့်မိတယ်။ ဆိုင်ကနှစ်ထပ်ရှိပြီး ကျနော်တို့ကအပေါ်ထပ်ကနေရောင်ရတဲ့စားပွဲမှာပါ။ VIP ခန်း ၃ခန်းရှိပြီးမိသားစုဆွေမျိုးသားချင်းတွေနဲ့ဖြစ်ဖြစ် business meeting တွေလုပ်ချင်ရင်ပဲဖြစ်ဖြစ်အဆင်ပြေပါတယ်။ မြန်မာလူမျိုးတွေနဲ့တရုတ်လူမျိုးတွေအဓိက လာစားလေ့ရှိတယ်လို့လည်းဆိုင်မန်နေဂျာကပြောပြတယ်။
ကြက်ဥပန်ကိတ်ကြော်ကကြွပ်ရွပြီးအဆိမ့်အရသာကဲတယ်။ ကြွက်နားရွက်မှိုကကျန်းမာရေးကိုအထောက်အကူ ပြုသလို ချဉ်စပ်အရသာကြောင့်ခံတွင်းကောင်းပြီး ဗိုက်ပိုဆာစေပါတယ်။
ဟင်းရည်ရောက်လာတော့ အိုးထဲက ၁ကီလိုဂရမ်အလေးချိန်ရှိတဲ့ငါးရံ့သားကိုဟင်းရည်ပူပူနဲ့အရင်စားကြတယ်။ လတ်ဆတ်တဲ့ငါးအသားဟာနူးညံ့ချိုမြနေပြီး ချဉ်စပ်ဟင်းရည်ထဲမှာမာလာရှန်းကောထဲမှာပါလေ့ရှိတဲ့ အထုံစေ့လေးတွေခပ်ထားတာမို့အရသာကထူးခြားတယ်။ ဟင်းရည်ချက်ထားပုံကိုစပ်စုကြည့်တော့ Fisherman’s Specialty ဟင်းရည်အနှစ်ထဲမှာ ၀ဥ၊ မုန့်ညှင်းချဉ်ဖတ်၊ ကြက်သွန်မြိတ်တို့ကို ငါးရံ့အသားခပ်ပြီးချက်ထားတာလို့သိရပါတယ်။ ဒီဆိုင်ရဲ့နောက်ထပ်ထူးခြားမှုကတော့အချဉ်ဖျော်စပ်ပုံပါ။ ငရုတ်၊ ကြက်သွန်မြိတ်နဲ့ ရှာလကာရည်ထဲမှာ ဆီတို့ဟူးနဲ့ပဲလုံးကြော်လေးတွေရောမွှေပြီး ဟင်းရည်တဇွန်းထည့်လိုက်တယ်။ ချိုဆိမ့်တဲ့အရသာရှိတဲ့အသားတွေနဲ့လိုက်ဖက်ပါတယ်။
ဟင်းရည်ပွက်နေတုန်းဆိုင်ဝန်ထမ်းလေးက စည်သွပ်ဝက်သားပြား၊ ငါးဥသွပ်ငါးအသားလုံး၊ ပုစွန်အသားလိပ်နဲ့ ဟင်းသီးဟင်းရွက်တွေထည့်ပေးတယ်။ ငါးအသားလုံးကိုကိုက်လိုက်ရင်မွှေးဆိမ့်နေတဲ့ငါးဥရည်လေးတွေ ထွက်လာပြီး ပူပူစပ်စပ်ဟင်းရည်နဲ့တွဲစားလို့ကောင်းပါတယ်။ စည်သွပ်ဝက်သားပြားကတော့ ပါးစပ်ထဲရောက်တာနဲ့ပျော်သွားလောက်တဲ့နူးညံ့မှုမျိုးပါ။ ပုစွန်အသားလိပ်ရဲ့အရသာဟာ တခြားဟော့ပေါ့နဲ့ ဒင်းဆမ်းဆိုင်တွေမှာစားရတာမျိုးနဲ့မတူဘဲ ပုစွန်အသားပိုများတယ်လို့ခံစားရပါတယ်။
ရေချိုပုစွန်ထုပ်ကိုတော့နောက်ဆုံးမှထည့်ပါတယ်။ ပုစွန်အကွေး ငါးအနွေးဆိုတဲ့စကားအတိုင်း ပုစွန်အကောင်ကွေးသွားပြီးအရောင်ရဲသွားတဲ့အချိန်မှာ ၀န်ထမ်းလေးကဆယ်ယူလိုက်တယ်။ ဒါကြောင့်အရမ်းကျက်ပြီးမာသွားတာမျိုးမရှိဘဲနူးညံ့အိစက်နေတယ်။ ပုစွန်ကတော့အချဉ်နဲ့တို့စားလို့ အလိုက်ဖက်ဆုံးပါပဲ။ ဒီဟော့ပေါ့ကိုကျနော်တို့သူငယ်ချင်း ၃ယောက် ၂နာရီနီးပါးစားရပါတယ်။ ဟော့ပေါ့ကချဉ်စပ်အရသာရှိတာမို့အစပ်ပြေဖို့အတွက် ထောပတ်သီးဖျော်ရည်ချိုချိုဆိမ့်ဆိမ့်လေးက အဆင်အပြေဆုံးဖြစ်မှာပါ။ ကျနော့်သူငယ်ချင်း ၂ယောက်ကတော့လိမ္မော်ရည်နဲ့ ဖရဲသီးဖျော်ရည်မှာပါတယ်။
ဈေးနှုန်းအားဖြင့်ယှဉ်ရင် Fisherman’s Wharf ကတခြားဟော့ပေါ့ဆိုင်တွေထက်အနည်းငယ်ပိုများပါတယ်။ ဒါပေမယ့်အရည်အသွေးနဲ့အရသာ၊ သန့်ရှင်းလတ်ဆတ်မှုနဲ့ ကျွမ်းကျင်ဖော်ရွေတဲ့ဝန်ထမ်းတွေရဲ့ဝန်ဆောင်မှု အားလုံးထည့်တွက်ကြည့်ရင်ပေးရတာထက်တန်တဲ့အစားအသောက်ကိုရတယ်လို့ဆိုရမှာပါ။ ဟင်းရည်တဇွန်းသောက်ပြီးတာနဲ့ဈေးနှုန်းကိုမေ့သွားမှာသေချာပါတယ်။ ကိုယ်ကြိုက်တာထည့်စားရတဲ့ဟော့ပေါ့ပုံစံအပြင် ၄ ယောက်စာ set-menu တွေလည်းရှိပါသေးတယ်။ ဟော့ပေါ့ဆိုတာကလည်း သူငယ်ချင်းတွေ မိသားစုဝင်တွေနဲ့ဝေမျှစားရင် ပိုအရသာရှိပါတယ်။ Fisherman’s Wharf ကဟော့ပေါ့လေးစားပြီး သင်္ကြန်အပြီးရုံးပြန်တက်ဖို့ အားမွေးကြရအောင်နော်။
လိပ်စာ – အမှတ် ၂၊ စမ်းချောင်းကျောင်းလမ်း၊ မရမ်းကုန်းမြို့နယ်၊ ရန်ကုန်။
ဖုန်းနံပါတ် – 09 977016666
ဆိုင်ဖွင့်ချိန် – 10am to 11pm
