The Beatles အဖွဲ့ရဲ့သီချင်းတွေကိုအခြေခံရိုက်ကူးထားတဲ့ Yesterday ရုပ်ရှင်ကို တော်တော်များများကြည့်ပြီးပြီလို့ထင်ပါတယ်။
ဒီဇာတ်ကားဟာဒါရိုက်တာ Danny Boyle ရိုက်ကူးထားတာဖြစ်ပြီး တကမ္ဘာလုံးမှာ Beatles အဖွဲ့နဲ့သီချင်းတွေအကြောင်းသိတဲ့သူတယောက်ပဲရှိတော့ရင်ဆိုတဲ့အတွေးနဲ့ စိတ်ကူးယဉ်ဆန်ဆန်လေးရိုက်ကူးထားတာပါ။ Jack Malik ဆိုတဲ့ဂီတသမားတယောက်ဟာ Beatles ကိုအရမ်းကြိုက်တဲ့သူ။ သူကိုယ်တိုင်သီချင်းတွေရေးဆိုပေမယ့် မအောင်မြင်သေးဘဲရုန်းကန်နေရတယ်။ တနေ့မှာလျှပ်စစ်မီးတွေပြတ်တောက်သွားပြီး Jack ဟာဘတ်စ်ကားတိုက်ခံလိုက်ရတယ်။ သူနိုးလာတဲ့အချိန်မှာတော့ တကမ္ဘာလုံးမှာ Beatles နဲ့သူတို့သီချင်းတွေကိုသိတဲ့သူဆိုလို့ သူတယောက်တည်းရှိတော့ကြောင်းသိလိုက်ရပါတယ်။
အဲ့ဒီမှာ Jack လည်း Beatles သီချင်းတွေကိုသူကိုယ်တိုင်ရေးထားသလိုလိုနဲ့ဆိုပြရင်း အရမ်းနာမည်ကြီးသွားတယ်။ ဒါပေမယ့် အတုအယောင်အောင်မြင်မှုဟာ Jack အတွက်ရေရှည်မှာကောင်းကျိုးပေးပါ့မလား။ Yesterday ဟာ Beatles ပရိသတ်တွေရော၊ စိတ်ကူးယဉ်ဇာတ်လမ်းကြိုက်တဲ့သူတွေအတွက်ပါ ကြည့်ရှုသင့်တဲ့ဇာတ်ကားတကားပါ။
ဒီဆောင်းပါးမှာတော့ Beatles ရဲ့နာမည်ကြီးသီချင်းတချို့ရဲ့နောက်ကွယ်ကဇာတ်လမ်းလေးတွေအကြောင်း ပြောပြချင်ပါတယ်။
Yesterday (1965)
Paul McCartney ရေးတဲ့ Yesterday ဟာ Beatles ရဲ့ အအောင်မြင်ဆုံးသီချင်းတွေထဲကတပုဒ်ဖြစ်သလို အဆိုတော်အများဆုံး cover ပြန်ဆိုကြတဲ့သီချင်းလည်းဖြစ်တယ်။ ဒီသီချင်းကို cover ဆိုကြတဲ့သူတွေထဲမှာ Elvis Presley၊ Boyz II Men၊ Frank Sinatra တို့လိုထိပ်ထိပ်ကြဲအဆိုတော်တွေပါဝင်ပြီး Boyle ရိုက်တဲ့ရုပ်ရှင်ရဲ့နာမည်လည်းဖြစ်ပါတယ်။ ဒီသီချင်းကိုရေးသားဖြစ်ခဲ့ပုံကတော့ တကယ့်ကိုမတော်တဆပါ။
McCartney ရဲ့အဆိုအရ တနေ့မှာသူအိပ်ရာကနိုးလာတော့ သူ့အိပ်မက်ထဲမှာတေးသွားလေးတခုကို ကြားနေခဲ့ပါသတဲ့။ အဲ့ဒါနဲ့သူလည်းစန္ဒရားခုံမှာထိုင်ပြီးအဲ့ဒီတေးသွားလေးကိုတီးကြည့်တယ်။ ဒါဟာနောင်တချိန်မှာ Yesterday ဆိုပြီးနာမည်ကြီးလာမယ့်သီချင်းရဲ့တေးသွားဖြစ်ပါတယ်။ စာသားကိုမစဉ်းစားရသေးခင်မှာတေးသွားကိုမေ့မသွားအောင် “Scrambled eggs, oh, my baby, how I love your legs…” ဆိုတဲ့စာသားနဲ့အရင်တီးထားခဲ့ပြီး Scrambled Eggs လို့ယာယီနာမည်ပေးထားခဲ့တယ်။ နောက်မှတီးလုံးနဲ့လိုက်တဲ့စာသားတွေ ထည့်သွင်းကြည့်ရင်း “Yesterday…all my troubles seemed so far away” အစချီတဲ့ Yesterday မွေးဖွားလာတာပါ။
Ref: https://www.telegraph.co.uk/culture/music/the-beatles/11680415/Yesterday-the-song-that-started-as-Scrambled-Eggs.html
Norwegian Wood (1965)
Haruki Murakami ရဲ့ဝတ္ထုဖတ်ဖူးတဲ့သူကတော့ ဒီသီချင်းကိုဝတ္ထုခေါင်းစဉ်အဖြစ်သိကြမယ်။ အခုမှစနားထောင်တဲ့သူတွေကတော့ နော်ဝေကတောအုပ်လေးတခုရဲ့သာယာလှပပုံကိုများဆိုထားသလားလို့ ထင်ကောင်းထင်ကြမယ်။ ဒါပေမယ့် Norwegian Wood ဆိုတာ ၁၉၆၀တ၀ိုက်လောက်ကခေတ်စားခဲ့တဲ့ အပေါစားပရိဘောဂတွေလုပ်တဲ့ထင်းရှူးသားကိုခေါ်တာပါ။
John Lennon နဲ့ Paul McCartney တို့ပူးတွဲရေးသားတဲ့ဒီသီချင်းဟာ Lennon ရဲ့တိတ်တိတ်ပုန်းအချစ်ဇာတ်လမ်းအကြောင်းဖြစ်ပါတယ်။ သီချင်းစာသားထဲကအမျိုးသားဟာ မိန်းကလေးတယောက်ရဲ့အိမ်ကိုလိုက်သွားတယ်။ ဒါပေမယ့်ကောင်မလေးကသူနဲ့ချစ်တင်းနှောခွင့်မပြုဘဲ ကောင်လေးကိုရေချိုးခန်းထဲမှာအိပ်ခိုင်းတယ်။ ကောင်လေးလည်းအိပ်ရာနိုးတော့စိတ်မကြည်တာနဲ့ တိုက်ခန်းကိုမီးရှို့ပစ်ခဲ့တဲ့အကြောင်းရေးထားတာပါ။ ဒီမိန်းကလေးရဲ့အိမ်ထဲက Norwegian Wood နဲ့လုပ်ထားတဲ့အပေါစားပရိဘောဂတွေကိုအစွဲပြုပြီး သီချင်းနာမည်ကို Norwegian Wood လို့ပေးခဲ့ခြင်းဖြစ်ပါတယ်။ George Harrison ဟာဒီသီချင်းမှာ အိန္ဒိယဂစ်တာ sitar ကိုရောစပ်တီးခတ်ခဲ့ပြီး ဒါဟာအနောက်တိုင်းပေါ့သီချင်းတပုဒ်မှာပထမဆုံးအနေနဲ့ sitar ပါဝင်ခဲ့ခြင်းလည်းဖြစ်ပါတယ်။
Ref: https://www.beatlesbible.com/songs/norwegian-wood-this-bird-has-flown/
Hey Jude (1968)
Paul McCartney ရဲ့နောက်ထပ်ပေါက်သီချင်းတပုဒ်ဖြစ်တဲ့ Hey Jude ကတော့ Lennon နဲ့သူ့အမျိုးသမီး Cynthia တို့ကွာရှင်းပြီးတဲ့နောက်မှာ သူတို့ရဲ့သားဖြစ်သူ Julian ကိုနှစ်သိမ့်ဖို့ Hey Jules ဆိုပြီးရေးခဲ့တာပါ။ နောက်မှ McCartney ဟာသူ့အကြိုက်ဆုံးတေးသံစုံဇာတ်မြူး Oklahoma! ထဲကဇာတ်ကောင် Jud ကိုအစွဲပြုပြီး Hey Jude လို့နာမည်ပြောင်းလိုက်ခြင်းဖြစ်ပါတယ်။
၇မိနစ်ကျော်ကြာတဲ့ဒီသီချင်းဟာ Beatles ရဲ့အရှည်ဆုံးသီချင်းလည်းဖြစ်သလို ထိုခေတ်အခါကအရှည်ဆုံး single သီချင်းလည်းဖြစ်တယ်။ Hey, Jude, don’t make it bad ဆိုပြီး ၅နှစ်သားအရွယ် Julian လေးကိုနှစ်သိမ့်ခဲ့တာကနေအစပြုပြီး Take a sad song and make it better ဆိုတဲ့စာသားနဲ့စိတ်ဓာတ်မကျဖို့ နှစ်သိမ့်ခဲ့တယ်။ Remember to let her into your heart ဆိုတာကတော့ Lennon ရဲ့နောက်ဇနီးဖြစ်လာမယ့် Yoko Ono ကိုကြည်ကြည်ဖြူဖြူနဲ့လက်ခံပေးဖို့ဖြောင့်ဖျတာပါ။
(ဂျာမန်ဘာသာနဲ့ဂျူးဘာသာဝင်တွေကို Jude လို့ခေါ်တာကြောင့် ဂျူးဘာသာဝင်တွေကို စောင်းရေးထားတယ်ဆိုပြီး အထင်လွဲခံခဲ့ရပါသေးတယ်)
Ref: https://www.cheatsheet.com/entertainment/why-paul-mccartney-wrote-hey-jude-for-john-lennons-son.html/
I Want to Hold Your Hand (1963)
McCartney ကသူတို့အဖွဲ့အနေနဲ့ အမေရိကကိုခြေမဆန့်ခင် အမေရိကန်ကြိုက်သီချင်းမြူးမြူးကြွကြွလေး တပုဒ်လောက်ထုတ်သင့်ကြောင်းအကြံရလာတယ်။ အဲ့ဒါနဲ့သီချင်းအေးအေးလေးတွေပဲအရေးများတဲ့ ဗြိတိသျှတီးဝိုင်းလည်း I want to hold your hand ဆိုတဲ့အမေရိကန်ကြိုက်သီချင်းမြူးမြူးလေး ဖန်တီးဖြစ်သွားပါတယ်။
Lennon နဲ့ McCartney တို့ဟာ McCartney ရဲ့ထိုအချိန်ကရည်းစား Jane Asher ရဲ့အစ်ကိုနေတဲ့အိမ်မြေအောက်ခန်းမှာ တနာရီလောက်အချိန်ယူပြီးစန္ဒရားတလုံးနဲ့ဒီသီချင်းကိုရေးခဲ့ကြတယ်။ ၁၉၆၃ခုနှစ် နိုဝင်ဘာမှာဒီသီချင်းဖြန့်ချီတော့ UK မှာနံပါတ် ၁နေရာရောက်ခဲ့ပြီး နောက်တလနေတော့ အမေရိကမှာဖြန့်ချီတဲ့အခါလူကြိုက်အရမ်းများခဲ့ပါတယ်။ ၁၉၆၄၊ ဖေဖော်ဝါရီ ၉ရက်နေ့မှာ USA ကို Beatles အဖွဲ့သွားရောက်ဖျော်ဖြေခဲ့ပြီးအမေရိကန်တွေရဲ့နှလုံးသားကိုသိမ်းပိုက်နိုင်ခဲ့ပါတယ်။
Ref: https://www.cheatsheet.com/entertainment/what-was-the-beatles-first-no-1-hit-in-america.html/
Strawberry Fields Forever (1967)
Lennon ၅နှစ်သားမှာ သူ့မိဘတွေစွန့်ပစ်ခြင်းခံခဲ့ရပြီးတဲ့နောက် သူ့အဒေါ် Mimi တို့လင်မယားနဲ့ Liverpool က Woolton မြို့မှာနေခဲ့ရပါတယ်။ သူငယ်ငယ်ကသူငယ်ချင်းတွေနဲ့ Salvation Army ရဲ့ Strawberry Fields ဆိုတဲ့မိဘမဲ့ဂေဟာအနားကဥယျာဉ်လေးမှာကစားလေ့ရှိတယ်။ ၁၉၆၆ မှာ ဒီသီချင်းကို Lennon ကသူ့ငယ်ဘ၀ကိုပြန်အောက်မေ့သတိရပြီးရေးခဲ့တာပါ။
Lennon ရဲ့ဖခင် Alf ဟာသင်္ဘောသားတယောက်ဖြစ်ပြီး အမြဲလိုလိုပင်လယ်ထဲမှာပဲအချိန်ကုန်တာများပါတယ်။ မိခင်ဖြစ်သူ Julia ဟာတခြားယောက်ျားတယောက်နဲ့ဖောက်ပြန်ရင်း သမီးလေးတယောက်ရတယ်။ မိဘနှစ်ပါးအအဆင်မပြေမှုတွေများလွန်းတဲ့အတွက် မိခင်ဘက်ကတော်တဲ့အဒေါ် Mimi ဟာ Lennon ကိုခေါ်ယူမွေးစားခဲ့တယ်။ “Living is easy with eyes closed… Misunderstanding all you see” စတဲ့စာသားတွေကိုကြည့်ရင် ဒီသီချင်းမှာ Lennon ရဲ့ငယ်ဘ၀စိတ်မချမ်းမြေ့မှုတွေအကြောင်းသိနိုင်ပါတယ်။ Lennon ကွယ်လွန်ပြီးနောက်ပိုင်းမှာ ဇနီးသည် Yoko ဟာသူ့အရိုးပြာတွေကိုသူတို့တိုက်ခန်းအနားက Central Park မှာဖြန့်ကျဲခဲ့ပြီး Strawberry Fields Memorial ကျောက်တိုင်စိုက်ထူခဲ့ပါတယ်။
Ref: http://www.todayifoundout.com/index.php/2016/03/beatles-strawberry-fields-forever-meaning/
Michelle (1965)
McCartney ငယ်ငယ်က Lennon နဲ့အတူပါတီပွဲတွေတက်ရင် ကောင်မလေးတွေစိတ်ဝင်စားမှုရအောင် ဂစ်တာတလုံးနဲ့မပီကလာပီကလာပြင်သစ်သီချင်းတွေဆိုလေ့ရှိပါတယ်။ အဲ့ဒီနောက်မှာတော့ ဒီလိုပြင်သစ်စာသားတွေနဲ့သီချင်းတပုဒ်လောက်လုပ်သင့်တယ်လို့ Lennon ကအကြံပေးတာနဲ့ ပြင်သစ်စာသားတပိုင်းတစပါဝင်တဲ့ Michelle ကိုရေးခဲ့တာပါ။ McCartney ဟာ ၂၀၁၀ ခုနှစ်က အိမ်ဖြူတော်မှာလုပ်တဲ့ပါတီတခုမှာ အဲ့ဒီတုန်းကအမေရိကန်သမ္မတ Barack Obama ရဲ့ကတော် Michelle Obama ကိုဂုဏ်ပြုတဲ့အနေနဲ့ ဆိုပြခဲ့ပါသေးတယ်။
Lucy in Sky with Diamonds (1967)
ဒီသီချင်းရဲ့ဇာတ်လမ်းကတော့နည်းနည်းဆန်းပါတယ်။ တချို့က Lucy in Sky with Diamonds ရဲ့ရှေ့စာလုံးတွေဖြစ်တဲ့ Lucy-Sky-Diamond ဟာထိုခေတ်ကခေတ်စားတဲ့ LSD မူးယစ်ဆေးကိုရည်ညွှန်းတာလို့ဆိုကြတယ်။ Picture yourself in a boat on a river… With tangerine trees and marmalade skies စတဲ့သီချင်းစာသားတွေကလည်းဆေးမူးနေတဲ့လူတယောက်ရဲ့ အိပ်မက်လိုလိုပါပဲ။ ဒါပေမယ့် ရေးသားသူ Lennon ကတော့ဒီအချက်ကိုငြင်းခဲ့တယ်။
ဒီသီချင်းဟာသူ့သားဖြစ်သူရဲ့အတန်းဖော်မိန်းကလေး Lucy ကိုအခြေခံတာလို့ပြောပါတယ်။ တနေ့မှာသူ့သား Julian ကျောင်းကပြန်လာတော့ မိုးပေါ်မှာပျံနေတဲ့မိန်းကလေးတယောက်ပုံဆွဲထားတာတွေ့ပြီး ဒါဘယ်သူလဲမေးကြည့်တဲ့အခါ စိန်ပွင့်တွေခြံရံပြီးကောင်းကင်မှာပျံနေတဲ့ Lucy လို့ Julian ကပြန်ဖြေခဲ့ပါတယ်။ အဲ့ဒါနဲ့ Alice in Wonderland ထဲကဇာတ်ကွက်တချို့နဲ့ရောစပ်ပြီး ဒီသီချင်းကိုရေးဖြစ်ခဲ့တာလို့ Lennon ကဆိုတယ်။
Ref: rollingstone.com
