အခုဆို admin အနေနဲ့ အိမ်ကနေအလုပ်လုပ်နေတာ တလကျော်သွားပါပြီ။ ပုံမှန်လုပ်နေကျအလုပ်တွေကိုအိမ်မှာလုပ်တာပဲဆိုပေမယ့် ဆက်သွယ်ရေးနဲ့စိတ်ပိုင်းဆိုင်ရာစိန်ခေါ်မှုလေးတွေတော့ကြုံရတတ်တယ်ဆိုတာသတိထားမိလာတယ်။ Admin နဲ့မိတ်ဆွေသူငယ်ချင်းတချို့ရဲ့ work from home မှာကြုံရတဲ့ပြဿနာတွေနဲ့ ဖြေရှင်းနည်းလေးတွေကိုပြောပြချင်ပါတယ်။ ကိုယ်ကောဘယ်လိုအခက်အခဲတွေနဲ့ကြုံရလဲဆိုတာ comment မှာမျှဝေသွားဖို့တိုက်တွန်းပါတယ်။
တဂွမ်ဂွမ်မြည်နေသောဖုန်း
Client ဖုန်းတွေကော ရုံးကအထက်အရာရှိနဲ့ လုပ်ဖော်ကိုင်ဘက်တွေရဲ့ဖုန်းတွေကော တာဝန်ယူဖြေနေရလို့ အိမ်သာတောင်ဖြောင့်ဖြောင့်မသွားရဲတဲ့အဖြစ်မျိုး တချို့တွေကြုံဖူးလိမ့်မယ်။
ဆိုတော့ဒီပြဿနာကိုဘယ်လိုဖြေရှင်းမလဲ။
ဖုန်းနဲ့ဆက်သွယ်ရတာအဆင်ပြေတယ်ဆိုပေမယ့် အခုလို text message တွေအရမ်းခေတ်စားနေတဲ့ခေတ်မှာ ဖုန်းဆိုတာအရေးပေါ်အခြေအနေမှာပဲသုံးသင့်ပါတယ်။ Client တွေကတော့အလုပ်အပ်ဖို့လိုအပ်ရင်ခေါ်မှာဖြစ်လို့ သူတို့ကိုတော့ငြိုငြင်လို့မရပါဘူး။ ဒါပေမယ့်ရုံးကအထက်အရာရှိနဲ့လုပ်ဖော်ကိုင်ဘက်တွေကိုတော့ email တို့ Viber တို့နဲ့ဆက်သွယ်ဖို့အားပေးပါ။ Admin ဆိုရင်အလုပ်ကိစ္စတွေဆိုစာနဲ့ပြောရတာပိုကြိုက်တယ်။ မှတ်တမ်းမှတ်ရာအဖြစ်ကျန်သလို ကိုယ်ဆိုလိုချင်တာကိုသေသေချာချာတွေးပြီးရေးလို့လည်းရလို့ပါ။
Video call… video call… video call…
ပွင့်ပွင့်လင်းလင်းပြောကြစို့ဗျာ။ Email တစောင် text message တခုလောက်နဲ့ပြီးသွားနိုင်တဲ့ကိစ္စမျိုးကို video call နဲ့ပြောနေရတာလူတိုင်းမုန်းတယ်။
ဆိုတော့ဒီအခြေအနေကိုဘယ်လိုသက်သာအောင်လုပ်မလဲ။
Video call ပြောတဲ့အခါကိုယ့်မျက်နှာကအဆီပြန်နေမလား၊ background ကအဆင်ပြေပါ့မလား စသဖြင့်တွေးပူတတ်သူဆိုရင်တော့ Zoom မှာမျက်နှာကိုကြည့်ကောင်းအောင်ပြင်ပေးတဲ့ touch up feature၊ background ကိုကိုယ်ကြိုက်ရာဓာတ်ပုံနဲ့ဗီဒီယိုပြောင်းလို့ရတဲ့ virtual background feature တွေပါပါတယ်။ Zoom နဲ့ဆို မိနစ် ၄၀ အတွင်း လူ ၁၀၀ လောက်အခမဲ့ပြောလို့ရတဲ့အတွက်လူတိုင်းအလွယ်တကူသုံးနိုင်တယ်။
Video call ပြောရင်းကိုယ်လုပ်နေတဲ့အလုပ်အနှောင့်အယှက်ဖြစ်မှာစိုးရင်တော့ ကိုယ့်ရဲ့တနေ့တာအချိန်ဇယားကို communication နဲ့ working ဆိုပြီး ၂ပိုင်းခွဲလိုက်ပါ။ Admin ဆိုမနက်ပိုင်းကို သတင်းဖတ်ဖို့၊ ရုံးကလူတွေနဲ့စကားပြောဖို့ဖယ်ထားပြီး နေ့လယ် ၁နာရီကနေရုံးဆင်းချိန်အထိကို အလုပ်သီးသန့်လုပ်ဖို့သတ်မှတ်ထားပါတယ်။ ကိုယ့်အလုပ်ကလူတွေကိုလည်း အရေးပေါ်ကိစ္စတွေကလွဲလို့ ပြောစရာရှိတာတွေကိုမနက်ပိုင်းမှာအပြီးပြောဖို့ request လုပ်ရပါတယ်။ ဒီနည်းဟာအခုချိန်ထိအဆင်ပြေနေပါသေးတယ်။
ယုံကြည်မှုတည်ဆောက်ခြင်း
အထက်အရာရှိတိုင်း အလုပ်ရှင်တိုင်းလိုလို သူတို့ဝန်ထမ်းတွေအိမ်မှာအလုပ်လုပ်နေရဲ့လား၊ တီဗီကြည့်နေသလား၊ အိပ်နေသလားစသဖြင့်တွေးမိတတ်ကြတယ်။ ဒါကလည်းသူတို့အပြစ်လို့ပြောဖို့ ခက်ပါတယ်။ ဝန်ထမ်းတွေထဲမှာလည်းစိတ်ထားအမျိုးမျိုးရှိကြတော့ ရုံးမှာတမျိုး၊ အိမ်မှာတမျိုးနေတတ်တဲ့သူတွေလည်းရှိမှာပါပဲ။ ခုနကလို အချိန်ပြည့် video call တွေခေါ် ဖုန်းတွေခေါ်နဲ့လုပ်နေတာဟာ ဝန်ထမ်းတွေအလုပ်ပုံမှန်လုပ်နေကြရဲ့လားလို့မသိမသာစစ်ဆေးတာလည်း ဖြစ်နိုင်တယ်။
အလုပ်ရှင်နဲ့ကိုယ်နဲ့ကြားမှာဘယ်လိုယုံကြည်မှုတည်ဆောက်မလဲ။
တနေ့တာ၊ တပတ်တာအတွက်ကိုယ်လုပ်မယ့်လုပ်ငန်းဆောင်တာတွေကို စာရင်းလုပ်ပြီး မနက်တိုင်း၊ ရက်သတ္တပတ်တခုရဲ့အစတိုင်းမှာ အထက်အရာရှိနဲ့ အလုပ်ရှင်ဆီတင်ပါ။ သူတို့ကိုယ့်အချိန်ဇယားနဲ့ပတ်သက်ပြီး စိတ်တိုင်းကျမှုရှိမရှိ၊ တခြား assignment တွေပေးဖို့ရှိမရှိမေးပါ။ ဒီလိုအချိန်ဇယားတင်ခြင်းဟာ ကိုယ့်ကိုစေ့စပ်တဲ့သူ၊ ဘာလုပ်ရမလဲဆိုတာသိနေတဲ့သူအဖြစ်အသိအမှတ်ပြုခံရနိုင်တဲ့အပြင် အိမ်မှာနေနေလည်း အလုပ်တာဝန်တွေမလစ်ဟင်းတဲ့သူအဖြစ်ယုံကြည်မှုလည်းရစေပါတယ်။ သတိပြုရမှာက ကိုယ်တကယ်အပြီးသတ်နိုင်တဲ့ပမာဏကိုပဲကတိပေးဖို့ပါ။ အထက်လူကြီးမျက်နှာသာရဖို့ ကတိတွေအများကြီးပေးပြီးမှ မတည်နိုင်ဘူးဆိုရင်ရှိပြီးသားယုံကြည်မှုတောင်ပျက်စီးသွားတတ်ပါတယ်။ Admin ကတော့အလုပ်ရှင်နဲ့ဝန်ထမ်းကြားယုံကြည်မှုရှိမှသာ work from home အဆင်ပြေနိုင်မယ်လို့ထင်ပါတယ်။
အနှောင့်အယှက်များ
အိမ်ဆိုတာအလုပ်ခွင်တခုလိုတိတ်ဆိတ်မှုရှိချင်မှရှိပါလိမ့်မယ်။ မိသားစုများတဲ့သူ၊ အဆောင်နေတဲ့သူတွေဆိုဆူညံမှုနဲ့ရင်းနှီးနေမယ်ထင်တယ်။ Video conference လုပ်နေတုန်း သီချင်းအကျယ်ကြီးဖွင့်တာမျိုး၊ စကားအကျယ်ကြီးပြောကြတာမျိုးကတော့ နားကြပ်လေးတခုနဲ့တင်ဖြေရှင်းနိုင်ပါတယ်။
ဒါပေမယ့်စိတ်ပိုင်းဆိုင်ရာအနှောင့်အယှက်တွေကိုကော ဘယ်လိုဖြေရှင်းကြမလဲ။
အတွေ့ရအများဆုံးကတော့ virus ကြောင့်အလုပ်အကိုင်တွေအဆင်မပြေတာကြာလာရင် ကိုယ့်အလုပ်တည်မြဲပါ့မလားဆိုတဲ့စိုးရိမ်မှုပါပဲ။ Admin ကတော့ကိုယ်မထိန်းချုပ်နိုင်တဲ့ကိစ္စတွေအကြောင်း တွေးပူနေတာအကျိုးမရှိဘူးလို့မြင်ပါတယ်။ ကပ်ရောဂါပျောက်ကွယ်သွားရင်တောင် ကမ္ဘာ့စီးပွားပျက်ကပ်ကိုနိုင်ငံတိုင်းအနည်းနဲ့အများကြုံရမှာပါပဲ။ ILO ကအလုပ်သမား ၁ ဒသမ ၆ဘီလျံအလုပ်ပြုတ်မယ်လို့ခန့်မှန်းထားတယ်။
အကောင်းဆုံးကတော့ကိုယ်တတ်နိုင်တာတွေလုပ်နေရင်း အလုပ်သစ်တခုအတွက်အဆင်သင့်ဖြစ်နေအောင် ပြင်ဆင်ထားဖို့ပါ။ တချို့က online ကနေအားတဲ့အချိန်ဘာသာစကားအသစ်တခုခုသင်နေကြတယ်။ Management လို HR လို functional skill တွေကိုအခြေခံလောက်ဖြစ်ဖြစ်လေ့လာနေကြသူတွေလည်းရှိတယ်။ စိတ်ပူနေမယ့်အစားအကျိုးရှိတာတခုခုနဲ့ အချိန်ကိုအသုံးချနေလိုက်တာကကိုယ့်စိတ်ကျန်းမာရေးအတွက်ပိုကောင်းပါတယ်။
အခြေအနေသစ်နဲ့အသားမကျခြင်း
New normal ဆိုတဲ့စကားကိုနိုင်ငံတကာမီဒီယာတွေမှာအတွေ့ရများလာတယ်။ ပြောရရင်မြန်မာနိုင်ငံမှာက freelancer တွေကလွဲလို့ အိမ်မှာအလုပ်လုပ်တဲ့ယဉ်ကျေးမှုမထွန်းကားဘူး။ နည်းပညာအခက်အခဲကြောင့်ပါသလို ဝန်ထမ်းကိုယ်တိုင်ကအဆင်သင့်မဖြစ်သေးတာလည်းပါတယ်။ နည်းပညာအခက်အခဲကကွန်ပျူတာဝယ်နိုင်ရင်၊ app သုံးနည်းတွေသင်ယူနိုင်ရင် အလွယ်တကူဖြေရှင်းလို့ရပါတယ်။
ဆိုတော့အခြေအနေသစ်အတွက်ကိုယ့်ကိုယ်ကိုယ်ဘယ်လိုပြင်ဆင်မလဲ။
အလွယ်ဆုံးနည်းကတော့ ရုံးတက်နေတုန်းကလိုဖြတ်သန်းဖို့ပါပဲ။ ရုံးဖွင့်ရက်တွေဆို အရင်ကလိုပဲ ၇နာရီလောက်ထမယ်။ စားသောက်ပြင်ဆင်ပြီးအလုပ်တွေပုံမှန်လုပ်မယ်။ နေ့လယ်ခင်း break time မှာတရေးအိပ်မိသွားတာမျိုးမဖြစ်အောင်နေမယ်။ ရုံးသွားနေတုန်းကလိုပဲကိုယ်လက်လှုပ်ရှားမှုရှိအောင် social distancing ညွှန်ကြားချက်တွေနဲ့အညီ mask တပ်ပြီးလမ်းလျှောက်မယ်၊ အိမ်မှာပဲသွေးပူလေ့ကျင့်ခန်းလုပ်မယ်ဆိုရင် လူလည်းတက်ကြွလန်းဆန်းပြီး ညဘက်မှာလည်းကောင်းကောင်းအိပ်ပျော်မှာပါ။
Work from home နဲ့ဘာကြောင့်အသားကျဖို့လိုလဲဆိုတော့ တချို့သူတွေအတွက် work from home ကထာဝရဖြစ်သွားနိုင်လို့ပါ။ အခုဆိုရင်လုပ်ငန်းရှင်တွေအနေနဲ့အလုပ်တခုပုံမှန်ပြီးမြောက်ဖို့အတွက် လူဘယ်နှယောက်ကိုတကယ်လိုအပ်သလဲ၊ ဘယ်သူတွေကတော့ဖြင့်အိမ်မှာနေရင်းအလုပ်ပုံမှန်လုပ်ပြီး ဘယ်သူတွေကတော့အပါးခိုသလဲလေ့လာလို့ရသွားပါပြီ။ စီးပွားပျက်ကပ်ကြောင့်မဖြစ်မနေဝန်ထမ်းတွေလျှော့ချဖို့လိုလာတဲ့အခါ ရုံးမှာတမျိုး အိမ်မှာတမျိုးလုပ်တတ်တဲ့သူတွေကအလုပ်ဖြုတ်ခံရနိုင်ချေများပြီး၊ ပုံမှန်အလုပ်လုပ်နိုင်တဲ့သူတွေက ရုံးမှာပဲဖြစ်ဖြစ် အိမ်မှာပဲဖြစ်ဖြစ်အလုပ်လုပ်ခွင့်ရလာနိုင်ပါတယ်။
ရုံးခန်းငှားခ၊ မီတာခ၊ သန့်ရှင်းရေးခတွေလျှော့ချဖို့လိုအပ်လာတဲ့အခါ ပိုအရွယ်အစားသေးတဲ့ရုံးခန်းပြောင်းငှားပြီး ဝန်ထမ်းတချို့ကိုအိမ်ကနေအလုပ်လုပ်ခိုင်းတာမျိုးတွေလည်းဖြစ်လာနိုင်ပါတယ်။ ဒါကြောင့်ကိုယ့်အလုပ်ကိုတကယ်ချစ်မြတ်နိုးတယ်၊ အိမ်ကနေလုပ်လို့ရတဲ့အလုပ်မျိုးလည်းဖြစ်တယ်ဆိုရင် အခြေအနေသစ်နဲ့အသားကျအောင်ကိုယ့်ကိုယ်ကိုယ်ပြင်ဆင်ဖို့လိုပါတယ်။
ရောဂါကပ်နဲ့ စီးပွားပျက်ကပ်ရန်ကနေကင်းဝေးပြီး စိတ်ချမ်းသာကိုယ်ကျန်းမာစွာနေထိုင်နိုင်ကြပါစေလို့ ဆုတောင်းပေးလိုက်ပါတယ်ခင်ဗျား။
