တိရိစ္ဆာန်တွေအပေါ်သနားကြင်နာမှုနဲ့သဘာဝပတ်ဝန်းကျင်ကိုထိန်းသိမ်းချင်စိတ်ကို စားသောက်ဆိုင်လုပ်ငန်းနဲ့ပေါင်းစပ်လိုက်တဲ့အခါမှာ Vegado ဖြစ်လာပါတယ်။ Vegan restaurant concept ကိုစတင်ဖြစ်ခဲ့တဲ့အကြောင်း Vegado ရဲ့ပဲ့ကိုင်ရှင် ၂ယောက်ဖြစ်သူ Blake ဟိန်းထက်နဲ့ Luis Kanu ကအခုလိုပြောပြတယ်။
Vegado ကတာဝန်ယူမှုရှိတဲ့စားသောက်ဆိုင်လုပ်ငန်းတခုကိုစားသုံးသူတွေနဲ့မိတ်ဆက်ပေးဖို့ ရည်ရွယ်ပါတယ်။ ဒီအတွက် အလဟဿစွန့်ပစ်ပစ္စည်းမရှိသလောက်နည်းဖို့၊ vegan (အသက်သတ်လွတ်နဲ့ တိရိစ္ဆာန်ထွက်မဟုတ်တဲ့) အစားအသောက်တွေကိုသာရောင်းချဖို့နဲ့ ဈေးနှုန်းသက်သာဖို့ကြိုးစားလျက်ရှိတယ်။
“Blake က vegan လေ။ သူ့ကျန်းမာရေးအတွက်ညီညွတ်တဲ့အစားအသောက်တွေချက်ပြုတ်ရင်း သဘာဝပတ်ဝန်းကျင်ကိုမထိခိုက်စေတဲ့စားသောက်ဆိုင်တခုဖွင့်ဖို့စိတ်ကူးရခဲ့တာပါ” လို့ Luis ကပြောပါတယ်။
ဆိုးဆေးမသုံးထားဘဲ စွန့်ပစ်စက္ကူတွေကိုပြန်လည်သန့်စင်အသုံးပြုထားတဲ့ဘူးတွေနဲ့ အစားအသောက်တွေကိုထုပ်ပိုးပါတယ်။ ပလတ်စတစ်လုံးဝမသုံးထားပါဘူး။ ဒီစားသောက်ဆိုင်ရဲ့အဓိကကြိုးပမ်းမှုကတော့အစားအသောက်တွေချက်ပြုတ်တဲ့အခါမှာအလေအလွင့်နည်းနိုင်သလောက်နည်းအောင်ပြင်ဆင်ခြင်းပါပဲ။
စာသုံးသူတွေနဲ့မှာချင်တာတွေကို တရက်ကြိုမှာဖို့လိုပါတယ်။ ဥပမာ မနက်ဖြန်စားမယ့်ဟင်းပွဲတွေကို ဒီနေ့ညနေ ၆နာရီနောက်ဆုံးထားပြီးမှာပေးရပါတယ်။ နောက်နေ့ဆိုင်ဖွင့်ချိန်အတွင်း အိမ်တိုင်ရာရောက်လာပို့ပေးပါလိမ့်မယ်။“ဒီစနစ်ကြောင့်အသီးအရွက်နဲ့ကုန်ကြမ်းတွေကိုသိုလှောင်ထားစရာမလိုဘဲ မှာသလောက်ပဲဝယ်ရတဲ့အတွက် လေလွင့်ပျက်စီးမှုလုံးဝမရှိပါဘူး။ မနက်တိုင်းဈေးသွားပြီးအလတ်ဆတ်ဆုံးကုန်ကြမ်းတွေကိုဝယ်ယူပါတယ်။”
တနင်္လာနေ့ကနေ စနေနေ့အထိဆိုင်ဖွင့်ပြီး အစားအသောက်တွေက မက္ကဆီကို၊ အရှေ့အလယ်ပိုင်းနဲ့ အမေရိကန်ဟင်းလျာတွေကနေ အရှေ့တိုင်းအထိပုံစံစုံပါတယ်။ Vegan burger နဲ့ Choco Fuzzy Pancake တွေပါရနိုင်တယ်။
Luis နဲ့ Blake ဟာစင်ကာပူကကြယ် ၅ပွင့်ဟိုတယ်တွေနဲ့ catering ဝန်ဆောင်မှုလုပ်ငန်းတွေမှာ စားဖိုမှူးအဖြစ်အချိန်ပိုင်းအလုပ်လုပ်ရင်းတွေ့ခဲ့ကြတာပါ။သူတို့ကအင်ဂျင်နီယာဘွဲ့အတွက်ပညာသင်ကြားခဲ့ကြပေမယ့် အချက်အပြုတ်ကိုပိုဝါသနာပါလာခဲ့တယ်။ Luis ကကိုယ်ပိုင်စီးပွားရေးလုပ်ချင်တယ်။ Vegan ဖြစ်တဲ့ Blake ကတော့မွေးရပ်မြေရန်ကုန်မှာ စားသောက်ဆိုင်တခုဖွင့်ဖို့စိတ်ကူးပါတယ်။ အဲ့ဒီကနေ Vegado ဖြစ်ပေါ်လာတာပါ။
“ပထမဆုံးအွန်လိုင်းသီးသန့် vegan စားသောက်ဆိုင်ဖွင့်မယ်။ နောက် ၃လလောက်နေရင် အွန်လိုင်း vegan ဈေးဖွင့်မယ်။ နောက် ၂နှစ် ၃နှစ်လောက်ဆိုရင်တော့ဆိုင်ခန်းဖွင့်မယ်စိတ်ကူးပါတယ်” လို့ Luis ကဆိုတယ်။
အခက်အခဲတွေရှိခဲ့ပေမယ့်လည်း Vegado ကအောင်မြင်စပြုလာပါပြီ။ အပတ်တိုင်းဟင်းပွဲ ၇၅ပွဲလောက်ရောင်းထွက်ပြီး ၇၀ရာခိုင်နှုန်းသောဖောက်သည်တွေက ရန်ကုန်မှာနေထိုင်ကြတဲ့နိုင်ငံခြားသားတွေဖြစ်ပါတယ်။ ဆိုင်သစ်တဆိုင်အနေနဲ့ Covid-19 ကာလမှာအဲ့လောက်ရောင်းရတာမဆိုးဘူးဆိုရမှာပါ။ ရန်ကုန်မှာနေထိုင်ကြသူတွေအနေနဲ့စားသောက်မှုပုံစံအသစ်ကိုလက်ခံစပြုလာပြီလို့လည်းဆိုနိုင်ပါတယ်။
Luis နဲ့ Blake တို့ဟာစီးပွားဘက်သူငယ်ချင်းတွေဖြစ်ပြီး ရည်ရွယ်ချက်တွေလည်းတူပေမယ့် Luis ကတော့ vegan မဟုတ်ပါဘူး။“လောလောဆယ်တော့လူတိုင်း vegan စားသောက်မှုပုံစံကိုလက်ခံနိုင်ဦးမှာမဟုတ်သေးဘူးဆိုတဲ့အမြင်နဲ့ပဲ စားသုံးသူတွေနဲ့ဆက်သွယ်ဖို့ကြိုးစားပါတယ်။ Vegan စစ်စစ်မဟုတ်တောင်မှ အသားလျှော့စားနိုင်ပါတယ်” လို့ Luis ကပြောပါတယ်။
Contact: Vegado.life
https://www.facebook.com/vegado.life
Mary Banfield ၏ Vegado: The Future of Food အားဘာသာပြန်ဆိုဖော်ပြအပ်ပါသည်။
