စင်္ကာပူနိုင်ငံက ကင်နမ် နဲ့ ဝင်ဒီတို့ရဲ့ သမီးလေးတွေဖြစ်တဲ့ ၁၇ နှစ်အရွယ် အမန်ဒါ နဲ့ ၁၄ နှစ်အရွယ် အမ်မလီယာတို့ ညီအစ်မနှစ်ယောက်ရဲ့ သံယောဇဥ်ကတော့ လူအများဩချရလောက်အောင် ကြီးမားလှပါတယ်။
အမ်မလီယာလေး တနှစ်ခွဲအရွယ်လောက်ကစပြီး အစာစွမ်းအင်ထုတ်ယူမှုဆဲလ်ပျက်စီးတဲ့ရောဂါ (Degenerative Mitochondrial Disorder)ကို စတင်ခံစားလာရပါတာ်။ အဲဒီ့အချိန်ကစပြီး သူ့ကျန်းမာရေးဟာ တဖြည်း ဖြည်း ဆုတ်ယုတ်စပြုလာပါတော့တယ်။
အမ်မလီယာလေးဟာ မထိုင်နိုင်၊ မထနိုင်၊ စကားမပြောနိုင်၊ မစားမသောက်နိုင် နဲ့ အပေါ့အလေးစွန့်ဖို့တောင် ခက်ခဲတဲ့အနေအထားတွေရှိလာပြီး နောက်ဆုံးမှာ အိပ်ရာထဲလှဲနေရတဲ့ ဘဝကို ရောက်ခဲ့ရပါတော့တယ်။ အသက် လေးနှစ်အရွယ်လောက်မှာ ဝက်ရူးပြန်ရောဂါကို ထပ်မံခံစားခဲ့ရပါသေးတယ်။
အမ်မလီယာလေး ဒီလိုဝေဒနာတွေကို စတင်ခံစားနေရချိန်မှာ အမန်ဒါဟာ ၅နှစ်သမီးသာ ရှိပါသေးတယ်။ “အတန်းဖော်သူငယ်ချင်းတွေ သူတို့ရဲ့ ညီငယ်၊ ညီမငယ်တွေကို ကျောင်းခေါ်လာတဲ့အချိန်မှာ သမီးရဲ့ ညီမလေးက သမီးနဲ့အတူ လိုက်မလာနိုင်တာကို သိရတော့ ဝမ်းနည်းမိမှတာပေါ့။ ဘယ်သူမဆို ကိုယ့်ရဲ့ မောင်နှမသားချင်းတွေနဲ့ အတူကစားချင်ကြတာပဲလေ” လို့ အမန်ဒါက ပြောပါတယ်။
အမ်မလီယာလေးကို တခုခု ဆက်သွယ်ချင်တဲ့အခါ လက်ဟန်ခြေဟန်အမူအရာတွေနဲ့ ပြောဆိုရပါတယ်။ အမ်မလီယာလေးရဲ့မျက်လုံးလှုပ်ရှားမှုကို ထောက်လှမ်းတဲ့ ကိရိယာကိုတပ်ဆင်ထားပြီး သူ့ရဲ့ပြန်လည်တုံ့ပြန်မှုတွေကို သိရှိနိုင်အောင်ဖန်တီးထားပါတယ်။ အမ်မလီယာလေးဟာ သူ့ရဲ့မျက်လုံးလှုပ်ရှားမှုကိုသုံးပြီး သီချင်းတွေလည်း ဖွင့်တတ်ပါသေးတယ်။
“ဘုရားသခင်ဆီမှာ တရားမျှတမှုရှိပါတယ်။ ညီမလေးက ဒုက္ခိတ ဖြစ်နေပေမယ့် အရမ်းတော်ပါတယ်”လို့ အမန်ဒါက ပြောပါတယ်။ အမန်ဒါ အလယ်တန်းဒုတိယနှစ်အရောက်မှာ ကျောင်းနားပြီး အိမ်တွင်းပညာရေးကို ရွေးချယ်ဖို့ဆုံးဖြတ်ခဲ့ပါတယ်။ မိဘတွေက အမန်ဒါရဲ့ ရှေ့ရေးကိုစဥ်းစားပြီး ကျောင်းဆက်တက်ဖို့ တိုက်တွန်းခဲ့ပေမယ့် အမန်ဒါက သူ့ညီမလေးနဲ့ အမြဲအတူရှိနိုင်ဖို့ကိုပဲ ဦးစားပေးခဲ့ပါတယ်။
သူတို့ညီအစ်မဟာ TVကြည့်ကြ၊ ကစားကြ၊ စကားတွေပြောကြနဲ့ အချိန်တွေကို အတူတူကုန်ဆုံးနေကြတာ သုံးနှစ်ကြာခဲ့ပါပြီ။ မိဘတွေကလည်း သူတို့ရဲ့သမီးတွေကို ပြင်ပကမ္ဘာနဲ့ အဆက်အသွယ်မပြတ်ရလေအောင် နိုင်ငံရပ်ခြားတိုင်းပြည်တွေကို အလည်အပတ်လိုက်ပို့ပေးတာမျိုးတွေ ပြုလုပ်ပေးပါတယ်။
အမ်မလီယာလေးရဲ့ နိစ္စဓူဝကိစ္စတွေကို လုပ်ကိုင်ပေးရတာ သိပ်တော့မလွယ်ကူလှပါဘူး။ သူဟာအလိုလိုအပေါ့အလေးမသွားနိုင်တဲ့အတွက် သန့်ရှင်းရေး ပုံမှန်လုပ်ပေးရပါတယ်။ အစာမစားနိုင်တဲ့အတွက်လည်း တနေ့ငါးကြိမ် ပြွန်နဲ့ သွင်းပေးနေရတာပါ။
သူတို့အမြဲစိတ်ပူနေရတာကတော့ အမ်မလီယာလေးရဲ့ အခြေအနေရုတ်တရက် ဆိုးရွားလာမှာကိုပါပဲ။ ဒါပေမယ့် အမ်မလီယာလေးလို ကလေးမျိုးတွေကို အဓိကထားကူညီ နေတဲ့ HCAအဖွဲ့နဲ့ ဆက်သွယ်မိခဲ့တာဟာ သူတို့မိသားစုကို စိတ်သက်သာရာ ရစေခဲ့ပါတယ်။
ပြီးခဲ့တဲ့ ဇွန်လတုန်းက အမ်မလီယာလေးဟာ သေးပေါင်ချိန်တွေတအားကျပြီး နှလုံးခုန်ရပ်လုနီးပါး ဖြစ်ခဲ့ပါတယ်။ ဆရာဝန်တွေလက်လျှော့ရတဲ့ အခြေအနေထိ ရောက်ခဲ့ပေမယ့် သူဟာ ပြန်လည်လွန်မြောက်လာနိုင်ခဲ့ပါတယ်။ “သူ့ရဲ့စိတ်ဓါတ်ကြံခိုင်မှုတွေကြောင့် ဒီလိုအခြေအနေဆိုးတွေကို ကျော်လွှားနိုင်ခဲ့တာပါ။ သူက သမီးတို့နဲ့ အချိန်အကြာကြီး အတူရှိသွားနိုင်မယ်ဆိုတာ သမီးယုံတယ်” လို့ အမန်ဒါကပြောပါတယ်။
အမန်ဒါဟာ လာမယ့်နှစ်မှာ တက္ကသိုလ်တက်ခွင့်ရှိပေမယ့် သူ့ညီမလေးနဲ့ မခွဲနိုင်တာကြောင့် တက်ဖြစ်မယ်မထင်ဘူးလို့ သူကပြောပါတယ်။ အမန်ဒါရဲ့ သူ့ညီမလေးအပေါ်မှာထားရှိတဲ့ သံယောဇဥ်ကတော့ လက်ဖျားခါလောက်စရာပါပဲ။ တကယ်တော့ ကျွန်တော်တို့ရဲ့ ကမ္ဘာကြီးဟာ ချစ်ခြင်းမေတ္တာတွေကြောင့်သာ အရာရာ လှပနေခဲ့တာပါ။
Wai Lin, Nine Thuwun
