မင်းကွန်း​ခေါင်း​လောင်းကြီးနဲ့ ကမ္ဘာ​ကျော် ကြီးငါးကြီး

ဧရာဝတီမြစ်ကမ်းနဖူးမှာ တည်​နေတဲ့ မင်းကွန်းဒေသဟာ ကမ္ဘာကျော် ကြီးငါးကြီး တည်ရှိရာ ဒေသ​လေးပါ။ ကြီးငါးကြီးဆိုတာက​တော့

၁။ မင်းကွန်းပုထိုးတော်ကြီး

၂။ မင်းကွန်းခေါင်းလောင်းတော်ကြီး

၃။ ပုထိုးတော်ကြီးရှေ့က ခြင်္သေ့ရုပ်ကြီး၂ရုပ်

၄။ မင်းကွန်းဆရာတော်ဘုရားကြီး

၅။ ကန်​တော်ကြီး တို့ပဲဖြစ်ပါတယ်။

၁။ မင်းကွန်းပုထိုး​တော်ကြီး

ဘိုး​တော်ဘုရားလက်ထက် ခရစ်နှစ် ၁၇၉၀မှာ ပုထိုး​တော်ကြီးကို လူသူအင်အား အများအပြားအသုံးပြုပြီး တည်ထား​ဆောက်လုပ်ခဲ့တာပါ။

“ဘုရားကြီးအပြီးတိုင်၊ မုဆိုးမဏ္ဍိုင်ကျိုးလိမ့်မလွဲ” ဆိုတဲ့ တ​ဘောင် ပေါ်လာတာကြောင့် ပုထိုး​တော်ကြီးတည်ထားမှုကို ဉာဏ်တော်ပေ၂၀၀ မပြည့်ခင်မှာပဲ ရပ်ဆိုင်းခဲ့ပါတယ်။ နဂိုက ဉာဏ်တော်အမြင့်​ပေ ၅၀၀ အထိ တည်ထားဖို့ ရည်ရွယ်ခဲ့တာပါ။ ပုထိုး​တော်ကြီးရဲ့ လုံးပတ်အကျယ်က​တော့ ၄၅၀ စတုရန်း​ပေ ရှိပါတယ်။

ပုထိုး​တော်ကြီးရဲ့​တောင်ဘက် ၄ဖာလုံအကွာမှာ ဉာဏ်​တော် ၁၅ပေ အမြင့်ရှိတဲ့ ပုံ​တော်​စေတီကိုလည်း တည်ထားခဲ့ပါတယ်။ ပုံ​တော်​စေတီဟာ ပုထိုး​တော်ကြီးရဲ့ ပုံစံငယ်ပါပဲ။

၂။ မင်းကွန်း​ခေါင်း​လောင်း​တော်ကြီး

မင်းကွန်း​ခေါင်း​လောင်းကြီးဟာ အသံမြည်တဲ့ ခေါင်း​လောင်း​တွေထဲမှာ​တော့ ဒုတိယအကြီးဆုံးပါ။ မင်းကွန်း​ခေါင်း​လောင်းကြီးကို ဧရာဝတီမြစ်အ​ရှေ့ဘက်ကမ်း စွန်းလွန်းရွာမှာ သွန်းလုပ်ခဲ့တာပါ။ ခရစ်နှစ် ၁၈၀၈ က​နေ ၁၈၁၀ အထိ ၂နှစ်ခန့် အချိန်ယူ သွန်းလုပ်ခဲ့ရပါတယ်။ ခေါင်း​လောင်းကြီးဟာ ၁၂ပေ မြင့်ပြီးတော့ ၅၅,၅၅၅ ပိဿာ အ​လေးချိန်ရှိပါတယ်။ မင်းဖြူမှန်မှန်​ပြော လို့ မှတ်သားထားကြပါတယ်။

မင်းကွန်းခေါင်းလောင်းက ကရင်မလင် နန်းတော် ရှိ ကမ္ဘာအကြီး ဆုံးခေါင်းလောင်းထက် အနည်းငယ် သေးပါတယ်။ ဒါပေမယ့် ရုရှ ခေါင်းလောင်းနဲ့ မတူတဲ့အချက်က ရုရှားခေါင်းလောင်းကြီးကွဲအက်ပေမယ့် မင်းကွန်း ခေါင်းလောင်းတော်ကတော့ အကောင်းအတိုင်း ရှိနေဆဲပါ။ ကြေးချိန်အလေးချိန်  ၈၇ တန်၊ အမြင့်က ၃.၇ မီတာ တဖြာ ၁၂ ပေ၊ အဝန်းက ၅ မီတာ သိုမဟုတ် ၁၆ ပေခွဲ၊ စဉ့်ကူးဘုရင်ရဲ့ မဟာဂန္ဒ ခေါင်းလောင်းထက် အတိအကျ ၃.၇၈ သိုမဟုတ် ၄ ဆနီးပါး ပိုလေးပါတယ်။

၃။ ပုထိုး​တော်ကြီးရှေ့က ခြင်္သေ့ရုပ်ကြီး၂ရုပ်

ဧရာဝတီမြစ်ဘက်ကို မျက်နှာမူပြီး တည်ထားတဲ့ ခြင်္သေ့ရုပ်ကြီး၂ရုပ်က​တော့ ခေတ်အဆက်ဆက် ငလျင်၊ မိုး၊ ရေ၊ လေ တိုက်စားမှု​တွေ​ကြောင့် ပြိုကျပျက်စီး​နေပြီဖြစ်ပြီး နောက်​ခြေ​ထောက်ပိုင်းသာ ကျန်ရှိ​တော့ပါတယ်။

၄။ မင်းကွန်းဆရာ​တော်ဘုရားကြီး

ပိဋကတ်သုံးပုံကို အာဂုံပြန်ဆိုနိုင်တဲ့ မင်းကွန်း တိပိဋကဆရာတော် ဘဒ္ဒန္တ ဝိစိတ္တသာရာဘိဝံသဟာ မှတ်ဉာဏ်အ​ကောင်းဆုံးလူသားအဖြစ် ဂင်းနစ် မှတ်တမ်းတင်ခြင်း ခံခဲ့ရပါတယ်။

၅။ ကန်​တော်ကြီး

ကြက်​ထောင့်ကန်လို့ လူသိများတဲ့ ကန်​တော်ကြီးဟာ စစ်ကိုင်း-မင်းကွန်း ကားလမ်း​ဘေးမှာ တည်ရှိပါတယ်။ ဘိုး​တော်ဘုရားလက်ထက် ခရစ်နှစ် ၁၈၁၇မှာ တူး​ဖော်ခဲ့တာဖြစ်ပြီး စတုရန်းပေ ၄၂၀ အကျယ်နဲ့ အနက် ၃၁ပေရှိပါတယ်။ မင်းကွန်း​ဒေသကို မန္တ​လေးက​နေ ဧရာဝတီမြစ်​ကြောင်းအတိုင်း ဆန်တက်နိုင်သလို စစ်ကိုင်းမြို့က​နေ ကုန်း​ကြောင်းအတိုင်း သွား​ရောက်နိုင်ပါတယ်။

Wai Lin, Nine Thuwun

Photo – Wikipedia