စောင့်နေလို့ပဲဖြစ်ဖြစ်၊ ပူလို့ပဲ ဖြစ်ဖြစ် ကားအဲကွန်းဖွင့်ပြီး အိပ်တဲ့သူတွေရှိပါတယ်။ ဒါဟာ အသက်အန္တရာယ်ရှိတဲ့ အပြုအမူဖြစ်ပါတယ်။ ကားပေါ်မှာ အဲကွန်းဖွင့်ပြီး အိပ်ရင် အခန့်မသင့် အသက်ဆုံးရှုံးတဲ့ထိ ဖြစ်နိုင်ပါတယ်။
၁။ ကားထဲမှာ အိပ်နေရင်း သေဆုံးစေတဲ့ အဓိကအကြောင်းရင်းက ဘာလဲ
ဓါတ်ဆီတွေ လောင်ကျွမ်းရာကနေ ထွက်ပေါ်လာတဲ့ ကာဗွန်မိုနောက်ဆိုဒ်ဓါတ်ငွေ့ဟာ ပြင်ပလေထုနဲ့ထိတွေ့နေချိန်မှာ ပျောက်ကွယ်ဖို့လွယ်ပေမယ့်အလုံပိတ်ခန်းတွေထဲမှာတော့ အချိန်အကြာကြီး တည်ရှိနေနိုင်ပါတယ်။ ၎င်းဓါတ်ငွေ့ဟာ အောက်ဆီဂျင်နေရာမှာ အစားထိုးဝင်ရောက်လာပြီး ရှူသွင်းမိတာများတဲ့အခါ သွေးနီဥတွေကို ခဲစေပြီး အသက်ရှူရပ်တန့်တဲ့အထိဖြစ်နိုင်တာပါ။ အရောင်အနံ့မရှိတဲ့ ကာဗွန်မိုနောက်ဆိုဒ်ဓါတ်ငွေ့ဟာ တကယ်ကြောက်စရာကောင်းတဲ့ အသံတိတ်လူသတ်သမားပါပဲ။
၂။ ကာမွန်မိုနောက်ဆိုဒ်အဆိပ်သင့်နေပြီဆိုတာကို ဘယ်လိုသိနိုင်မလဲ
ခေါင်းကိုက်ခြင်း၊ ကိုယ်လက်မအီမသာဖြစ်ခြင်း၊ မူးနောက်နေခြင်း၊ ပျို့အန်ခြင်း၊ ရင်ဘတ်အောင့်ခြင်း၊ အသက်ရှူကြပ်ခြင်း၊ ဇဝေဇဝါဖြစ်ခြင်း၊ လေသင်တုန်းဖြတ်ခြင်း၊ အားအင်ကုန်ခမ်းခြင်းစတာတွေဖြစ်နေပြီဆိုရင် သတိထားသင့်ပါပြီ။ ရှူသွင်းမိတဲ့ ပမာဏများလေလေ အဆိုပါလက္ခဏာတွေ ပိုပြီး ပြလေလေပါပဲ။လေထုထဲမှာ ကာဗွန်မိုနောက်ဆိုဒ်ပမာဏတအားများနေမယ်ဆိုရင် သတိလစ်မေ့မြောတဲ့အထိ ဖြစ်နိုင်ပါတယ်။ ကားထဲမှာ အိပ်နေရင်း ဘာလက္ခဏာမှ မပြဘဲ သေဆုံးသွားတာမျိုးလည်း ရှိတတ်ပါတယ်။
၃။ ယာဥ်ကြောပိတ်နေချိန်မှာရော ဓါတ်ငွေ့ဆိပ်သင့်နိုင်လား?
ယာဥ်ကြောပိတ်နေပေမယ့် ကားဟာ အနည်းနဲ့အများတော့ ရွေ့လျားနေမှာပါ။ ကာဗွန်မိုနောက်ဆိုဒ်ဓါတ်ငွေ့ဟာ ပျံ့နှံ့ဖို့ အချိန်ယူရပါတယ်။ ကားထဲမှာ ပမာဏအနည်းငယ်တော့ ရှိနေနိုင်ပါတယ်။သက်ကြီးရွယ်အိုတွေ၊ ကလေးငယ်တွေ၊အသက်ရှူပြသနာနဲ့ နှလုံးရောဂါရှိသူတွေ၊ သွေးအားနည်းသူတွေနဲ့ လေသင်တုန်းဖြတ်လေ့ရှိသူတွေကတော့ သတိထားသင့်ပါတယ်။
၄။ ကာဗွန်မိုနောက်ဆိုဒ်အဆိပ်သင့်ခြင်းကို ဘယ်လိုကာကွယ်နိုင်မလဲ
သင့်ကားရဲ့ အိတ်ဇောကို အမြဲပြင်ဆင်စစ်ဆေးပါ။ သင့်ကားရဲ့အသေးအမွှားထိခိုက်ပျက်စီးမှုလေးတွေကအစ ဂရုတစိုက်ပြင်ဆင်ပါ။ မြေအောက်ကားပါကင်တွေမှာ ကားတံခါးတွေကိုအလုံပိတ်ခဲ့ဖို့နဲ့ စက်ကိုရပ်ခဲ့ဖို့ မမေ့ပါနဲ့။ သင့်ကားမှာ ကာဗွန်မိုနောက်ဆိုဒ်တိုင်းကိရိယာတပ်ဆင်ထားပါ။
Wai Lin, Nine Thu Wun
Photo – Shutter Images
